एजेन्सी – केही महिना अघि अन्तर्राष्ट्रिय क्रिकेट परिषद(आइसिसी) को अध्यक्षमा निर्वाचित जय शाहको कार्यकाल आइतवार सुरु भएको छ । शाहले ग्रेग बार्कलेको स्थान लिएका हुन् ।

‘आइसिसीको अध्यक्षको भूमिका निर्वाह गर्न पाउँदा म गौरवान्वित छु र आइसिसी निर्देशक तथा सदस्य बोर्डको सहयोग र विश्वासका लागि आभारी छु,’ शाहले आफ्नो कार्यकालको पहिलो दिन जारी गरेको विज्ञप्तिमा भनिएको छ ।

उनले भनेका छन्, ‘ खेलका लागि रोमाञ्चक समय हो किनकि हामी एलए २८ ओलम्पिक खेलको तयारी गरिरहेका छौं । क्रिकेटलाई थप समावेशी बनाउन र विश्वभरका प्रशंसकका लागि आकर्षक बनाउन काम गरिरहेका छौं ।’

‘हामी धेरै ढाँचाहरूको सह-अस्तित्व र महिला खेलको विकासलाई गति दिने आवश्यकताको साथ एक महत्वपूर्ण मोडमा छौं । क्रिकेटले विश्वव्यापी रूपमा अथाह सम्भावना बोकेको छ र म आइसिसी टोली र सदस्य राष्ट्रहरूसँग मिलेर यी अवसरहरूको सदुपयोग गर्न र खेललाई नयाँ उचाईमा पुर्याउन उत्सुक छु ‘ शाहले बताए ।

शाह आइसिसीकाे अध्यक्षमा निर्विरोध निर्वाचित भएका थिए । आइसिसीमा उनी अहिलेसम्मका सबैभन्दा कम उमेरका अध्यक्ष हुन् । शाह ३६ वर्षको उमेरमा उनी आइसिसीको अध्यक्ष निर्वाचित भएका हुन् ।

आइसिसीको अध्यक्षमा निर्वाचित हुनुअघि शाह भारतीय क्रिकेट बोर्ड बिसिसिआईको सचिव थिए । शाहले यसअघि एसियन क्रिकेट काउन्सिल(एसिसी) को अध्यक्ष तथा आइसिसीको वित्त तथा व्यावसायिक मामिला समितिको अध्यक्षको रूपमा पनि काम गरेका थिए ।