काठमाडौं(हाम्रो खेलकुद) – सिद्धार्थ बैंक नेपाल प्रिमियर लिग(एनपिएल) को शनिवारको पहिलो खेलमा ओपनर सेफ अलि जेबको अर्धशतकको सहयोगमा लुम्बिनी लायन्सविरुद्ध सुदूरपश्चिमले बलियो योगफल तयार गरेको छ ।

टियु क्रिकेट मैदानमा जारी खेलमा सुदूरपश्चिमले लुम्बिनीलाई १ सय ८८ रनको बलियो लक्ष्य दिएको हो । टस हारेर ब्याटिङको निम्तो पाएको सुदूरपश्चिमले निर्धारित २० ओभरमा ४ विकेट गुमाएर १ सय ८८ रनको बलियो योगफल तयार गर्यो ।

सुदूरपश्चिमका लागि सेफले सर्वाधिक ९० रन जोडे । उनले ६१ बलमा ६ चौका र ५ छक्का प्रहार गरेका थिए । रेमन सिमोण्डको बलमा सेफ उमुक्त चन्दबाट समातिए । सेफ आउट भए लगत्त क्रिजमा आएका आरिफ शेख अर्को बलमा नै आउट भए ।

कप्तान दीपेन्द्रसिंह ऐरीले १९ बलमा ४ चौका र २ छक्काको सहयोगमा नट आउट ३९ रन बनाए । ब्रेन्डन मक्मेलनले २० बलमा १ चौका र १ छक्काको सहयोगमा २३ रन बनाए । उनी विवेक यादवको बलमा साद विन जाफरको बलमा क्याच आउट भए ।

विनोद भन्डारीले १३ बलमा १७ रन जोड्दै लुम्बिनीका कप्तान रोहित पौडेलको बलमा क्याच आउट भए । भन्डारी ठूलो सट खेल्ने प्रयासमा बाउन्ड्रि नजिक सन्दीप जोराबाट समातिए । लुम्बिनीका लागि रेमन सिमोण्डले २ तथा कप्तान रोहित पौडेल र विवेक यादवको नाममा समान १ विकेट रह्यो ।

लुम्बिनी सुरुवाती दुवै खेलमा हार बेहोरेर दबाबमा छ। पहिलो खेलमा विराटनगर किंग्ससँग हारेको लुम्बिनीले पोखरा एभेन्जर्ससँगको खेल पनि गुमाएको थियो । सुदूरपश्चिम भने लगातार तेस्रो जित निकाल्दै शीर्ष स्थानमा उक्लिने लक्ष्यमा रहेको छ । सुदूरपश्चिमले पहिलो खेलमा विराटनगर र दोस्रोमा काठमाडौं गुर्खाजलाई पराजित गरेको थियो ।

आजै हुने दोस्रो खेलमा विराटनगर किंग्स र कर्णाली याक्स भिड्दै छन् ।