भुपेन्द्र जि.सी.

नेपाल प्रिमियर लिग (एनपीएल) मा उत्कृष्ट प्रदर्शन गर्ने एक नेपाली खेलाडीले ६२ लाख रुपैयाँ पर्ने ओमोडा कार पाउनेछन् । नेपाल क्रिकेट संघ (क्यान) ले प्रतियोगिता अघि नै उक्त घोषणा गरेको थियो ।

प्रतियोगिता लिग सम्पन्न हुँदा सुदूरपश्चिम रोयल्स शीर्ष, जनकपुर बोल्ट्स दोस्रो, चितवन राइनोज तेस्रो र कर्णाली याक्स चौथो स्थानमा रहँदै प्लेअफमा पुगे ।

कुनैपनि प्रतियोगितामा सर्वोत्कृष्ट अवार्ड जित्न सर्वाधिक रन र विकेट मात्रै होइन सँगै टोलीको नतिजा र प्रभाव पनि महत्त्वपूर्ण हुन्छ । लिगमा गरेको प्रदर्शनले बढी महत्व पाएपनि कार जित्न प्लेअफ र फाइनलको प्रदर्शनले पनि छाप पर्दछ । सबै खेलाडीको प्रदर्शन हेर्दा यी पाँच खेलाडी कार जित्ने दावेदारी देखाएका छन् ।

५.ललित राजवंशी ( जनकपुर बोल्ट्स)

जनकपुरलाई १० अंकका साथ दोस्रो स्थानमा रहँदै प्लेअफमा पुर्याउन बायाँ हाते स्पिनर ललित राजवंशीले महत्वपूर्ण योगदान दिएका छन् । नयाँ बलका साथ पावर प्ले र मध्यक्रममा गरी कुल २८ ओभर बलिङ गर्दै १३९ (४.९६ को इकोनमी) मा रन खर्चेर सर्वाधिक विकेट(१३) लिने खेलाडीमा दोस्रो स्थानमा छन् । उनी अघि सुदूरपश्चिमका स्कट कुग्लेइन १५ विकेटका साथ शीर्ष स्थानमा छन् ।

उनले प्लेअफ हुँदै आफ्नो उत्कृष्ट प्रदर्शनमा टोलीलाई च्याम्पियन बनाउन सके कार जित्न सक्ने सम्भावना देखिन्छ । तर नकआउट अद्भूत प्रदर्शन विना भने कार जित्न सक्ने छैनन् । उनी मात्रै एक खेलमा विकेटविहीन हुँदा पोखरा एभेन्जर्स, विराटनगर किंग्स र काठमाण्डु गुर्खाजविरुद्ध ३(३ विकेट लिएका थिए । चितवनविरुद्ध २, लुम्बिनी र कर्णालीविरुद्ध १-१ विकेट लिएका थिए ।

४.रिजन ढकाल (चितवन राइनोज)

बायाँ हाते तीव्र गतिका बलर रिजन ढकालले आफ्नो उत्कृष्ट प्रदर्शनमा चितवनलाई ८ अंकका साथ तेस्रो स्थानमा रहँदै प्लेअफसम्म पुर्याउन ७ खेलमा २४.५ ओभरमा १८८ रन खर्चेर १३ विकेट लिए । उनी सर्वाधिक विकेट लिने सूचिमा ललितसँगै संयुक्त रुपमा दोस्रो स्थानमा छन् ।

चितवन प्लेअफ हुँदै च्याम्पियन बन्न उनले थप उत्कृष्ट बलिङ गर्नुपर्ने हुन्छ । तीव्र गतिका बलरमा उनी नेपाली खेलाडीमा सर्वाधिक विकेट लिने खेलाडी समेत हुन् । उनी पछि काठमाण्डुका करण केसीले १२ विकेट लिएका छन् ।

पोखरालाई ७४ रनमा अल आउट गर्न उनले ३ ओभरमा १० रन खर्चेर ३ विकेट लिदै प्लेअयर अफ द म्याच चुनिएका थिए । उनले लुम्बिनी र पोखराविरुद्ध ३-३, जनकपुर, विराटनगर र सुदूरपश्चिमविरुद्ध २-२ विकेट लिएका थिए । कर्णालीसँग विकेटविहीन र काठमाण्डुविरुद्ध १ विकेट लिएका थिए ।

३. रोहित पौडेल (लुम्बिनी लायन्स)

टोलीको प्रदर्शन कमजोर रहेपनि राष्ट्रिय टोली तथा लुम्बिनी लायन्सका कप्तान रोहित पौडेलको प्रदर्शन भने राम्रो रह्यो । लिगमा सर्वाधिक २ सय ७९ रन बनाउनुको साथै ८ विकेट लिएपछि रोहित कार जित्ने दौडमा छन् । उनले ७ खेलमा २ अर्धशतकका साथ २१२ बल खेल्दै २७९ रन बनाए ।

रोहितले विराटनगरविरुद्ध ४६, पोखराविरुद्ध ९५, जनकपुरविरुद्ध ३५ र चितवनविरुद्ध ८० रन बनाएका थिए । चितवनविरुद्ध ८० रन बनाउनुको साथै ४ विकेट लिदै प्लेअयर अफ द म्याच चुनिए । लुम्बिनी ७ खेलमा मात्रै एकमा जितका साथ पुछारमा रहेर बाहिरियो । यदि टोलीको नतिजा नहेरेको खण्डमा कार जित्ने दाबेदारमा रोहित अन्य खेलाडीको तुलनामा अघि नै आउँछन् ।

२. कुशल मल्ल (चितवन)

अलराउण्डर कुशल मल्लले प्रतिस्पर्धात्मक पहिलो कप्तानीमै राम्रो प्रभाव छाड्न सफल भए । तुलनात्मक रुपमा कमजोर देखिएको चितवनलाई प्लेअफसम्म पुर्याउन उनले अलराउण्ड प्रदर्शन गरेका छन् । कुशलले ७ खेलमा २ सय २ रन बनाउदै सर्वाधिक रन बनाउने खेलाडीमा चौथो स्थानमा छन् ।

साथै स्पिन बलिङ गर्दै सबै खेलमा राम्रो प्रभाव छाड्दै ८ विकेट लिएका छन् । कप्तानीमा प्रभाव, टोलीलाई प्लेअफसम्म पुर्याउन सफल, ब्याटिङ र बलिङ दुबैमा उत्कृष्ट प्रदर्शन गरेको हुँदा कुशलले कार जित्ने सम्भावना बलियो छ ।

उनले प्लेअफमा पुग्न निर्णायक जस्तै मानिएको जनकपुरविरुद्ध ४१ बलमा ३ चौका र ७ छक्कासहित ७२ रन बनाउनुको साथै २ विकेट लिदै प्लेअर अफ द म्याच चुनिएका थिए । काठमाण्डुविरुद्ध ११ रन, पोखराविरुद्ध ३८, कर्णालीविरुद्ध २३, सुदूरपश्चिमविरुद्ध १३, लुम्बिनीविरुद्ध २० र विराटनगरविरुद्ध २५ रन जोडेका थिए । उनले पोखरा बाहेक अन्य सबै खेलमा विकेट लिएका छन् । उनले जनकपुर र सुदूरपश्चिमविरुद्ध २-२ तथा विराटनगर, लुम्बिनी, कर्णाली र काठमाण्डुविरुद्ध १-१ विकेट लिएका छन् । उनले बाँकी नक आउट खेलमा थप राम्रो गर्न सके कार आफ्नो पक्षमा पार्न झनै सजिलो हुनेछ ।

१. दीपेन्द्रसिंह ऐरी (सुदूरपश्चिम रोयल्स)

सुदूरपश्चिम रोयल्सलाई १२ अंकका साथ शीर्ष स्थानमा रहँदै प्लेअफमा पुर्याउन कप्तान दीपेन्द्रको भूमिका निकै महत्वपूर्ण छ । कप्तानी, बलिङ र ब्याटिङ तीनै क्षेत्रमा राम्रो गरेको हुँदा दीपेन्द्र कार जित्ने दाबेदारमा लिग चरणसम्मको प्रदर्शनमा अग्रस्थानमा छन् । उनले ७ खेलमा १९८ रन बनाउनुको साथै ५ विकेट लिएका छन् ।

आंकणमा अन्य खेलाडीको तुलनामा विकेट र रन कम भएपनि सुदूरलाई ७ मध्य ६ खेल जिताउन उनको प्रदर्शन निकै महत्वपूर्ण छ । ब्याटिङमा फिनिसर र बलिङमा मध्यक्रममा उनले राम्रो प्रभाव छाड्न सफल भए । उनले लिगमा दुई प्लेअअर अफ द म्याच अवार्ड (विराटनगर र कर्णालीविरुद्ध) जितेका छन् ।

अन्य चार दाबेदार खेलाडीले लिगमा १-१ मात्रै प्लेअयर अफ अवार्ड जिते । कुनैपनि खेलाडीलाई सर्वोत्कृष्ट अवार्ड दिन प्लेअर अफ द म्याच पहिलो प्राथमिकतामा पर्दछ । प्लेअर अफ द म्याचमा धेरै अंक हुने हुँदा दीपेन्द्र अन्य खेलाडीको तुलनामा कार जित्ने दौडमा अग्रस्थानमा छन् । नकआउट खेलमा पनि उनको प्रदर्शन महत्वपूर्ण हुनेछ ।

दीपेन्द्रले विराटनगरविरुद्ध २४ बलमा ३ चौका र ५ छक्कासहित ७५ रनको इनिङ खेल्दै प्लेअर अफ द म्याच जितेका थिए । काठमाण्डुविरुद्ध ४३ र लुम्बिनीविरुद्ध ३९ रनको अविजित इनिङ खेलेका थिए । चितवनसँग १ र जनकपुरविरुद्ध डक आउट भएका थिए । पोखराविरुद्ध २० रन बनाउदा कर्णालीलाई हराउन ३८ रन बनाउनुको साथै २ विकेट लिएका थिए । बलिङतर्फ ५ विकेट लिए ।