राकेश तिमल्सिना भरतपुर – भरतपुरको बाल्मिकी शिक्षा सदनले राष्ट्रव्यापी एक्सपर्ट स्कुल क्रिकेट लिग चितवनको उपाधि जितेको छ । भरतपुरको एडभेन्चर इंग्लिस स्कुललाई ७१ रनले पाखा लगाउदै बाल्मिकी च्याम्पियन बनेको हो ।

विशाल चोकस्थित नौ बिगाहा मैदानमा टस जितेर पहिले ब्याटिङ गरेको बाल्मिकीले २३.५ ओभरमा अलआउट हुदै १ सय २८ रन बनायो । टोलीका लागि विशाल भट्टराई २१ र समिर अधिकारीले १८ रन जोडे । एडभेन्चरका प्रयास गौतमले ३ तथा सुजन थापा र पर्वत श्रेष्ठले समान २ विकेट लिए । १ सय २९ रनको विजय लक्ष्य पछ्याएको एडभेन्चरले १६.५ ओभरमा सबै विकेट गुमाउदै ५७ रनमात्र बनाउन सक्यो । टोलीका लागि सुजन थापाले १३ रन बाहेक अन्य खेलाडीले दोहारो अंकमा रन बनाउन सकेनन् । बाल्मिकीका अनुराग सुवेदीले ४ र सुजन भट्टराईले ३ विकेट लिए ।

अब बाल्मिकीले अन्य ७ क्षेत्रको विजेतासँग च्यापियन्स ट्रफीका लागि प्रतिस्पर्धा गर्नेछ । उत्कृष्ट बलिङ गरेका बाल्मिकीका अनुराग सुवेदी प्लेयर अफ द म्याच घोषित भए । खेल हेर्न आएका दर्शकमध्येबाट सोनम गुरुङ लक्की ड्र मार्फत एक्सपर्ट फ्यान अफ द डे घोषित भइन् । उनलाई मुख्य प्रायोजक एक्सपर्ट एजुकेशन एण्ड भिजा सर्भिसेसले रु २ हजार प्रदान गर्यो । त्यस्तै, प्रतियोगिताको उत्कृष्ट ब्याट्सम्यान सनराइजका आशिष लम्साल घोषित भए । उत्कृष्ट बलरको उपाधि एडभेन्चरका प्रयास गौतमले प्राप्त गरे । उत्कृष्ट फिल्डरमा एडभेन्चरका पवन घले पुरस्कृत भए । म्यान सिरिजको उपाधि एडभेन्चरका विकेटकिपर विनोद गुरुङले प्राप्त गरे ।

चितवन र आसपासका १० विद्यालयको सहभगितामा सञ्चालन भएको प्रतियोगिता माघ २८ देखि सञ्चालन भएको थियो ।