काटमाडौं (हाम्रो खेलकुद) – नेपाल प्रिमियर लिग (एनपीएल) मा सुदूरपश्चिम रोयल्सका कप्तान तथा मार्की खेलाडी दीपेन्द्रसिंह ऐरीले ६५ लाख रुपैयाँ बराबरको कार जिते ।

शनिबार फाइनलमा सुदूरपश्चिम जनकपुर बोल्ट्सँग ५ विकेटले पराजित भएपनि दीपेन्द्रले अन्य चार दाबेदारलाई पछि पार्दै कार जितेका हुन् । दीपेन्द्रले कार जित्नुका तीन प्रमुख आधार भने यस प्रकार छन् ।

३. अलराउन्ड प्रदर्शन

सुदूरपश्चिमलाई फाइनलसम्म पुर्याउन दीपेन्द्रले ब्याटिङ, बलिङ र फिल्डिङ तीनै पक्षमा अलराउण्ड प्रदर्शन गरे । ९ खेलमा २ सय २७ रन बनाउनुको साथै उनले ९ विकेट लिएका थिए ।

च्याम्पियन जनकपुर बोल्ट्सका ललित नारायण राजवंशी अर्का दाबेदार थिए । ललितले १० खेलमा १७ विकेट लिदै सुदूरपश्चिमका स्कट कुग्लेइनसँग संयुक्त रुपमा सर्वाधिक विकेट लिने खेलाडी बने । ललितको प्रभाव जनकपुरको उपाधि होडमा निकै बलियो थियो । तर क्यानले उपविजेता रहेपनि अन्तत: दीपेन्द्रलाई नै कार दिने निर्णय गर्यो ।

२. टोलीको नतिजा

दीपेन्द्रको कप्तानीमा सुदूरले लिगमा चितवन र फाइनलमा जनकपुरसँग हार्न बाहेक सबै खेलमा जितेको थियो । कारको दाबेदारमा लुम्बिनी लायन्सका रोहित पौडेल (२७९ रन र ८ विकेट), चितवनका कुशल मल्ल (२ सय २३ रन र ९ विकेट) र रिजन ढकाल (१३ विकेट) का साथ दाबेदारमा थिए ।

प्रदर्शनको हिसाबमा दीपेन्द्र भन्दा रोहित अघि छन् । तर लुम्बिनी लिग चरणबाटै बाहिरियो । सर्वोत्कृष्ट अवार्डमा टोलीको नतिजा पनि निकै महत्त्वपूर्ण हुन्छ । त्यसपछि कुशल मल्ल र रिजन ढकाल दाबेदार थिए । तर चितवन पनि इलिमिनेटरबाटै बाहिरियो । त्यसैको कारण दीपेन्द्रलाई कार जित्न थप सहज भयो । ललित भने जनकपुरलाई उपाधि दिलाएपनि अभागी भए ।

१. दुई प्लेयर अफ द म्याच अवार्ड

एनपिएलमा दीपेन्द्रले दुई प्लेयर अफ द म्याच अवार्ड(कर्णाली र विराटनगर) विरुद्ध जितेका थिए । अन्य दाबेदार (रोहित, कुशल, ललित र रिजन ले १-१ प्लेयर अफ द म्याच अवार्ड जितेका थिए । सर्वोत्कृष्ट खेलाडीको मुल्यांकनमा खेलाडीले प्रतियोगिताभर पाउने अंकको पनि भूमिका हुन्छ । प्लेयर अफ द म्याचको अंकबाट बढी हुन्छ । दुई प्लेयर अफ द म्याच अवार्ड हुँदा दीपेन्द्रको अंक अन्यको तुलनामा धेरै भयो ।