सागर अधिकारी ,काठमाडौं

सिद्धार्थ बैंक नेपाल प्रिमियर लिग (एनपिएल) को पहिलो संस्करण शनिवार सकिँदा प्रदर्शनमा विदेशी खेलाडीको दबदबा रह्यो ।

सुदूरपश्चिम रोयल्सलाई ५ विकेटले पराजित गर्दै जनकपुर बोल्ट्स एनपिएलको च्याम्पियन बनेको हो । जनकपुर र सुदूरपश्चिमलाई फाइनलको यात्रा गराउनेमा विदेशी खेलाडी प्रदर्शन स्मरणीय रह्यो ।

लिग चरण, प्लेअफ र फाइनल गरि एनपिएलमा ३२ खेल भएका थिए । सबैभन्दा बढी खेल च्याम्पियन जनकपुरले १०, दोस्रो सुदूरपश्चिम र तेस्रो भएको कर्णाली याक्सले समान ९ , चितवन राइनोजले ८ खेल खेलेका थिए ।

काठमाडौं गुर्खाज, विराटनगर किंग्स, पोखरा एभेन्जर्सले र लुम्बिनी लायन्सले ४ समान ७ खेल खेलेका थिए।
एनपिएलमा सर्वाधिक रन र विकेट लिने १० खेलाडी यस प्रकार छन् ।

सर्वाधिक रन बनाउने शीर्ष १०

एनपिएलमा सर्वाधिक रन बनाउने खेलाडी शीर्ष १० मा च्याम्पियन टोली जनकपुरका २ ,दोस्रो सुदूरपश्चिमका ४ , चितवनका २ तथा खेलाडी पोखरा र लुम्बिनीका समान १ खेलाडी छन् । शीर्ष १० भित्र ४ नेपाली तथा ६ विदेशी खेलाडी छन् ।

१) लाहिरु मिलन्था (जनकपुर)

जनकपुरलाई च्याम्पियन बनाउन मालिन्थाले फाइनलमा महत्वपूर्ण अर्धशतक बनाएका थिए । उनले लिगका १० खेलमा २ अर्धशतक सहित २ सय ९३ रन जोडेका थिए । मिलन्थाले फाइनल खेल तथा पहिलो खेलमा अर्धशतक बनाएका थिए ।

२) रवि बोपारा (चितवन)

इङ्ग्ल्याण्ड टोलीका पुर्व सदस्य रहेका अलराउण्डर रवि बोपारा पहिलो संस्करणको लिगमा सर्वाधिक(३) अर्धशतक बनाउने खेलाडी हुन् । चितवनको प्रतिनिधित्व गरेका बोपाराले ८ खेलमा ३ अर्धशतक सहित २ सय ८६ रन बनाए ।

३) रोहितकुमार पौडेल (लुम्बिनी)

रोहितकुमार पौडेल नेपाली खेलाडी मध्ये एनपिएलमा सर्वाधिक रन बनाउने खेलाडी हुन् । रोहितले लिगमा लुम्बिनी लायन्सको कप्तानी गरेका थिए । टोलीले एकपछि अर्को असफलताको सामना गरिरहँदा रोहित उत्कृष्ट ब्याटिङ प्रदर्शन गरे । उनले ७ खेलमा २ अर्धशतक सहित २ सय ७९ रन बनाए ।

४) सेफ अलि जेब (सुदूरपश्चिम)

प्रतियोगिताकै उत्कुष्ट खेलाडी भएका जेब सुदूरपश्चिम रोयल्समा आबद्ध थिए । उनले फाइनलमा सहित २ अर्धशतकका साथ ९ खेलमा २ सय ७५ रन जोडेका थिए ।

५) जेम्स निशम (जनकपुर)

प्रतियोगिताकै सर्वाधिक उच्च स्ट्राईक रेट(१ सय ९६.०३) मा रन जोडेका निशम जनकपुरमा आबद्ध रहेका थिए । उनले ९ खेलमा १ अर्धशतक सहित २ सय ४७ रन जोडे ।

६) विनोद भण्डारी (सुदूरपश्चिम)

प्रतियोगितामा नै उच्च लयमा देखिएका विनोदको योगदानले सुदूरपश्चिम रोयल्सले हरेक खेलमा राम्रो सुरुवात पाएको थियो । १ अर्धशतक प्रहार गरेका विनोदले ९ खेलमा २ सय ३५ रन जोडे ।

७) दीपेन्द्रसिंह ऐरी (सुदूरपश्चिम)

प्रतियोगिताकै उत्कृष्ट खेलाडी बन्दै कार पुरस्कार पाएका दीपेन्द्रको कप्तानीमा सुदूरपश्चिम रोयल्स उपविजेता भएको थियो । उनले ९ खेलमा १ अर्धशतक सहित २ सय ३५ रन बनाए।

८) आन्द्रेस गौस (पोखरा)

प्रतियोगितामा एक मात्र शतक प्रहार गर्ने आन्द्रेस गौस पोखरा एभेन्जर्समा आबद्ध रहेका थिए । उनले ६ खेलमा १ शतकको सहयोगमा २ सय २४ रन बनाए ।

९) कुशल मल्ल (चितवन)

चितवन राइनोजका कप्तान कुशल मल्लले प्रतियोगितामा १ अर्धशतक प्रहार गरेका छन् । उनले ८ खेलमा २ सय २३ रन बनाए।

१०) ब्राण्डन मक्मलेन (सुदूरपश्चिम)

सुदूरपश्चिम रोयल्समा आबद्ध मक्मलेनले प्रतियोगिताका ९ खेलमा २ सय १ रन बनाएका थिए । मक्मुलनको नाममा १ अर्धशतक रहेको छ ।

सर्वाधिक विकेट लिने शीर्ष १० खेलाडी

सर्वाधिक १० विकेट लिनेमा च्याम्पियन जनकपुरका ३, सुदूरपश्चिम, चितवन, काठमाडौं गुर्खाजका समान २ तथा कर्णाली याक्सका १ खेलाडी छन् । सर्वाधिक विकेटकर्ताको शीर्ष १० मा ५ नेपाली र ५ विदेशी खेलाडी छन् ।

१) स्कट कुग्गेलेइन – सुदुरपश्चिम रोयल्स – ९ खेलमा १७ विकेट
२) ललितनारायण राजवंशी – जनकपुर बोल्ट्स – १० खेलमा १७ विकेट
३) सोहेल तन्भिर – चितवन राइनोज – ८ खेलमा १४ विकेट
४) किशोर महतो – जनकपुर बोल्ट्स – १० खेलमा १४ विकेट
५) विपिन शर्मा – कर्णाली याक्स – ८ खेलमा १३ विकेट
६) रिजन ढकाल – चितवन राइनोज – ८ खेलमा १३ विकेट
७) सेफ अलि जेब – सुदूरपश्चिम रोयल्स – ९ खेलमा १२ विकेट
८) करण केसी – काठमाडौं गुर्खाज – ७ खेलमा १२ विकेट
९) मोहम्मद मोहसिन – जनकपुर बोल्ट्स – ९ खेलमा १२ विकेट
१०) जेहार्ड एरास्मस – काठमाडौं गुर्खाज – ७ खेलमा ११ विकेट