काठमाडौं (हाम्रो खेलकुद) – नेपाली क्रिकेट टोलीका कप्तान पारस खड्का सफल उपचारपछि आइतबार अस्पतालबाट घर फर्केका छन् । अचानक पेट दुखेपछि उनलाई शुक्रबार धापासीको ग्राण्डी अन्तर्राष्ट्रिय अस्पतालमा भर्ना गरिएको थियो ।
पारसलाई रिकरेन्ट एपेन्डिसाइटिस बीथ इन्टेसटाइनल अब्स्ट्रक्सन भएकोले उहाँको क्यामेरा प्रबिधिबाट एड्हेसियोलाइसिस तथा कि होल सर्जरी (गुजुल्टीएका आन्द्राहरु मिलाउने) तथा इमरजेन्सी ल्यापारोस्कोपिक एपेन्डिक्टोमी गरिएको अस्पतालका मेडिकल डाइरेक्टर डा चक्रराज पाण्डेले जानकारी दिए । पारसलाई एक सातापछि फलोअपका लागि बोलाइएको अस्पतालले जनाएको छ ।
पारसको उपचारमा प्रबिण बिक्रम थापा, धिरेश महर्जन, रोशन घिमिरे र सन्तोष श्रेष्ठको चिकित्सक टोली संलग्न थियो । त्यस्तै एनेस्थेसियामा चिकित्सकहरु मुरारीराज उप्रेति र अर्चन अधिकारीको टोलीले साथ दिएको थियो ।
पेटमा सानो प्वाल मात्र पारेर सर्जरी गरिएकोले मैदानमा फर्कने विश्वास चिकित्सकहरुले विश्वास लिएका छन् । शुक्रबार दिउँसो सहनै नसक्ने गरेर पेट दुखेपछि उनलाई परिवारका सदस्यले अस्पताल पुर्याएका थिए । नेपालले विश्व क्रिकेट लिग च्याम्प्यिनसिप अन्तर्गत मार्च ११ र १३ मा काठमाडौंमा केन्यासँग प्रतिस्पर्धा गर्दैछ ।
