मुम्बई (एजेन्सी)– इन्डियन प्रिमियर लिग (आइपिएल) २०१७ अन्तर्गत मंगलबार भएको खेलाडी लिलामीमा इङ्ल्यान्डका अल राउन्डर बेन स्टोक्स साँढे १४ करोड भारतीय रुपैयाँमा राइजिङ पुने वारियर्समा आबद्ध भएका छन् । पुनेसँग आबद्ध भएका स्टोक्स आइपिएलका दोस्रो महँगा खेलाडी हुनेछन् । सर्वाधिक कमाउने विदेशी खेलाडी भने स्टोक्स पहिलो नम्बरमा आँउछन् । रोयल च्यालेन्जर्स बेगंलोरर्सले भारतीय कप्तान विराट कोहलीलाई सबैभन्दा बढी १५ करोड भारतीय रुपैयाँ तिरेको छ ।
त्यस्तै इङ्ल्यान्डका तीब्र गतिका बलर टिमल मिल्सलाई १२ करोड तिर्दै बेगंलोरले सर्वाधिक कमाउने बलर पनि बनाएको छ । त्यस्तै इङ्ल्यान्डका अलराउन्डर क्रिस वोक्सलाई कोलकाता नाइट राइडर्सले ४ करोड २० लाख भारतीय रुपैयाँ खर्चियो भने ब्याट्सम्यान ओइन मोर्गन पन्जाबमा २ करोडमा विक्री भए ।
अर्का ब्याट्सम्यान जेसन रोय १ करोड भारतीय रुपैयाँमा गुजरातमा आबद्ध भए । इङ्ल्यान्डका अलराउन्डर क्रिस जोर्डनले हैदराबादबाट खेल्दा ५० लाख भारतीय रुपैयाँ कमाउने भएका छन् । मोर्गन, रोय र जोर्डन सबै न्यूनतम तोकिएको रकममा बिक्री भएका हुन् ।
त्यस्तै एसोसिएट खेलाडीमा अफगानिस्तानका मोहमद नाबी र १८ बर्षिय स्पिनर रासिद खान हैदराबादमा आबद्ध भएका छन । नाबीलाई ३० लाख खर्चेको हैदराबादले रासिदलाई ४ करोडमा खरिद गरेको हो । युएइका ब्याट्सम्यान चिराग सुरी भने गुजरातसँग १० लाख भारतीय रुपैयामा आबद्ध भए ।
अनुभवी खेलाडी इरफान पठान, आरपी सिंह र इशान्त शर्मालाइ कुनै टोलीले खरिद नगरेको अवस्थामा भारतका लागी कुनै पनि अन्तर्राष्ट्रिय खेल नखेलेका मोहम्मद सिराज भने ३ करोड ५ लाखमा हैदराबादले भित्राएको छ ।
