काठमाडौं(हाम्रो खेलकुद) – थाइल्याण्डलाई हराउँदै नेदरल्याण्ड्सले जारी त्रिकोणात्मक टि ट्वान्टी आई सिरिजको उपाधि सम्भावना कायमै राखेको छ ।

नेदरल्याण्ड्सले बिहीवार थाइल्याण्डलाई रोमान्चक खेलमा १ विकेटले हराएको छ । १ सय १० रनको लक्ष्य नेदरल्याण्ड्सले निर्धारित २० ओभरको अन्तिम बलमा ९ विकेट गुमाएर पूरा गर्यो ।

नेदरल्याण्ड्सको जितमा फेबे मोल्केबरले सर्वाधिक ३२ रन जोडिन् । उनले ४२ बलमा २ चौका प्रहार गरिन् । रोबिन रिकेले २१ बलमा १ चौकाको सहयोगमा २० रन बनाइन् । स्टेर कालिसले १२ बलमा १४ रन जोडिन् ।

त्यसअघि कीर्तिपुस्थित टियु क्रिकेट मैदानमा टस जितेर ब्याटिङ रोजेको थाइल्याण्डले निर्धारित २० ओभरमा ५ विकेट गुमाएर १ सय ९ रनको मध्यम योगफल तयार गर्यो ।

थाइल्याण्डका लागि नान्नाफाट चैहान नट आउट रहँदै सर्वाधिक ३६ रन बनाइन् । उनले ४६ बलमा ४ चौका र १ छक्का प्रहार गरिन् ।

पाँचौ विकेटका लागि चैहान र चानिदा सुत्थिरुआंगले ६६ रनको साझेदारी गरेका थिए । सुत्थिरुआंगले २८ बलमा ४ चौकाको सहयोगमा ३२ रन जोडिन् । कप्तान नारुइमोल चाइवाईले २६ बलमा १५ रन जोड्दा सुवानान खियाओतोले नट आउट १० रन बनाइन् ।

थाइल्याण्डले पछिल्लो ५ ओभरमा ४६ रन जोडेको थियो । नेदरल्याण्ड्सका लागि आइरिस विलिङले ३ र हेटर सिगर्सले २ विकेट लिइन् ।

नेदरल्याण्ड्सलाई भने उपाधि सम्भावना कायमै राख्न यो खेलमा जित अत्यावश्यक थियाे । नेदरल्याण्ड्सले जारी सिरिजमा थाइल्याण्डलाइ पहिलाे पटक पराजित गरेकाे हाे ।

आजको नतिजापछि नेदरल्याण्ड्स र थाइल्याण्ड दुवैको उपाधि सम्भावना कायमै रहेको छ । नेदरल्याण्ड्सले उपाधि जित्न शुक्रवार नेपालले थाइल्याण्डलाई फराकिलो रुपमा हराउनु पर्ने हुन्छ ।

त्यो खेलमा नेपाल सामान्य अन्तरले पराजित भएमा थाइल्याण्डले उपाधि जित्नेछ । सहभागी टोलीले एकअर्कासँग समान ३ पटक खेल्नेछन् ।

अंक तालिकाको शीर्ष स्थानमा रहने टोली विजेता बन्नेछ । सिरिजको अन्तिम खेल शुक्रवार नेपाल र थाइल्याण्डबिच हुनेछ।