काठमाडौं(हाम्रो खेलकुद) – विश्व कप लिग टुमा शीर्ष स्थानको अमेरिकाले नामिबियालाई पराजित गरेको छ ।

अमेरिकाले शनिवार नामिबियालाई १ सय १४ रनको फराकिलो अन्तरले पराजित गर्यो । प्राविधिक कारण ढिला सुरु भएकोले खेल ४३ ओभरमा छोट्याइएको थियो ।

२ सय ९४ रनको लक्ष्य पछ्याएको नामिबिया ४०.२ ओभरमा १ सय ७९ रनमा अल आउट भएको थियो । नामिबियाका लागि मलान कुर्जरले ४४ बलमा सर्वाधिक ३२ रन जोडे ।

शान फुचे २२, रुवेन ट्रम्पलम्यान २१, कप्तान जेरार्ड एरास्मस १८ रन बनाए। जान फ्र्यलिंक, बेनार्ड स्कोड्जे र जेन ग्रिन समान १६ रनमा आउट भए ।

अमेरिकाका लागि मिलान्ड कुमारले ४, हर्मित सिंहले २ , सञ्जय कृष्णमुर्ती, नोश्तुस केन्जिगे र सौरभ नेत्रभाल्करले समान १ विकेट लिए ।

त्यसअघि ओमानमा टस हारेर ब्याटिङको निम्तो पाएको अमेरिकाले निर्धारित ४३ ओभरमा ८ विकेट गुमाएर २ सय ९३ रनको योगफल तयार गरेको थियो ।

अमेरिकाका लागि कप्तान मोनांक पटेल, आन्द्रेश गौस र मिलान्ड कुमारले अर्धशतक बनाए । ओपनर गौसले सर्वाधिक ७६ रन बनाए । उनले ८३ बलमा ४ चौका र ३ छक्का प्रहार गरे । कप्तान पटेलले ६० बलमा ८ चौका र १ छक्काको सहयोगमा ६५ रन जोडे ।

मिलान्डले ३४ बलमा ६ चौका र २ छक्काको सहयोगमा ५४ रन बनाए । साइतेजा मुककामल्ला ३१ र सञ्जय कृष्णमुर्ती र हर्मित समान १८ रनमा आउट भए ।

आठ टोली सहभागी लिगमा अमेरिका १३ खेलमा १८ अंकका साथ शीर्ष स्थानमा छ । नामिबिया १३ खेलमा १० अंकका साथ छैठौं स्थानमा छ । नेपाल लिगको पुछारबाट दोस्रो स्थानमा छ ।