एजेन्सी – अमेरिकाले ओमानमाथि लिग टुमा ऐतिहासिक जित हासिल गरेको छ ।

अमेरिकाले मंगलवार सबैभन्दा कम लक्ष्य दिदैं खेल जित्ने कीर्तिमान बनाएको छ । अमेरिकाले ओमानलाई १ सय २३ रनको लक्ष्य दिदैं जित पनि हासिल गरेको हो । यसअघि भारतले पाकिस्तानलाई १ सय २६ रनको लक्ष्य दिदैं जितेको इतिहास रहेको थियो ।

१ सय २३ रनको सामान्य लक्ष्य पछ्याएको ओमानले २५.३ ओभरमा ६५ रनमा सबै विकेट गुमायो । ओमानका लागि हमिद मिर्जाले सर्वाधिक २९ रन जोडे । मिर्जा बाहेक ओमानका अन्य कुनै ब्याटरले दोहोरो अंकमा रन जोड्न सकेनन् ।

अमेरिकाका लागि नोस्तुष केन्जिगेले ७.३ ओभरमा ११ रन खर्चिएर ५ विकेट लिए । यासिर मोहम्मद र मिलान्ड कुमारले समान २ र हर्मित सिंहले १ विकेट लिए ।

त्यसअघि ओमानको मस्कटमा टस हारेर ब्याटिङको निम्तो पाएको अमेरिका ३५.३ ओभरमा १ सय २२ रनमा समेटियो । टोलीका मिलान्ड कुमारले नट आउट रहँदै सर्वाधिक ४७ रन जोडे ।

आरोन जोन्स र संजय कृष्णमुर्तीले समान १६, आन्द्रेश गौसले १४ तथा हर्मित सिंहले १० रन जोडे । अमेरिकाका अन्य ब्याटरले दोहोरो अंकमा रन जोड्न सकेनन् ।

जितसँगै अमेरिका १६ खेलमा २२ अंकका साथ शीर्ष स्थानमा छ । ओमान समान खेलमा १८ अंकका साथ दोस्रो स्थानमा छ । नेपाल १२ खेलमा ६ अंकका साथ पुछारबाट दोस्रो स्थानमा छ ।

विश्व कप लिग टु सिरिज २०२३ देखि २०२७ सम्म जारी रहनेछ । लिगमा ८ टोली सहभागी लिगको शिर्ष ४ टोली विश्व कप छनोटमा सिधै स्थान बनाउँदा ४ टोली विश्व कप छनोटका लागि प्लेअफमा स्थान बनाउँने छन् ।