काठमाडौं(हाम्रो खेलकुद) – धनगढीमा जारी एसपिए कैलाली प्रिमियर लिग–३ मा समूह ‘डी’ को पहिलो खेलमा भिमदत्त नगरपालिकाले पर्शुराम नगरपालिकालाई ४७ रनले पराजित गरेको छ ।

१ सय ६३ रनको लक्ष्य पछ्याउने क्रममा पर्शुरामले २० ओभरमा ८ विकेट गुमाएर १ सय १५ रन मात्र बनाउन सक्यो ।

पर्शुरामका लागि कप्तान राज विश्वकर्माले सर्वाधिक ३८ रन बनाए । दिल बहादुर बोहराले ३४ र ओपनर अर्जुन बिकले १६ रन जोडे ।

भिमदत्तका लागि सन्तोष भट्टले ४ ओभरमा १ मेडन राख्दै ११ रन खर्चेर ४ विकेट लिएका सन्तोष भट्ट प्लेयर अफ दि म्याच घोषित भए । समिर बिस्ट र अरुण ऐरीले समान १ विकेट लिए ।

त्यसअघि फाप्ला क्रिकेट मैदानमा टस जितेर ब्याटिङ गरेको भिमदत्तले निर्धारित २० ओभरमा ९ विकेट गुमाउँदै १ सय ६२ रन बनायो ।

भिमदत्तका लागि सन्तोष भट्टले सर्वाधिक ३२ रन बनाए । किरण चन्दले ११ बलमा ३१ रनको आक्रामक पारी खेले । नितेह बिस्टले २७, अभिषेक थापाले २० तथा अरुण ऐरीले १९ रन जोडे ।

पर्शुराम लागि अर्जुन बिकले ४ ओभरमा १ मेडन राख्दै २१ रन खर्चेर ३ विकेट लिए । टेक थलालले २ तथा कृष्ण बिस्टले १ विकेट लिए ।

समूह सी अन्तर्गतका शनिवार नै भएको दोश्रो तथा प्रतियोगीताको आठौं खेलमा बाजुराको त्रिवेणी नगरपालिका विजयी भएको छ ।

त्रिवेणीले वेदकोट नगरपालीकालाई ६ विकेटले पराजित गर्दै प्रतियोगीतमा सुखद सुरुवात गरेको हो । १ सय १९ रनको लक्ष्य त्रिवेणीले १५.५ ओभरमा ४ विकेट गुमाउँदै पूरा गर्यो ।

त्रिवेणी नगरपालिकाका लागि राजु रिजालले उत्कृष्ट ब्याटिङ गरे । ३० बलको सामना गरेका रिजालले ३ चौका र २ छक्काको मद्दतले ४१ रनको नट आउट पारी खेले । त्यस्तै सुमित श्रेष्ठले २१ रन बनाउँदा तुल बहादुर थापा १९ रनमा अविजित रहे ।

विजय राना र शुशिल खड्काले समान १६ रन बनाए । वेदकोट नगरपालिका लागि लक्ष्मण खडायतले २ तथा विवेक बोहरा र महेश बिष्टले समान १ विकेट लिए ।

त्यसअघि टस जितेर पहिला ब्याटिङ गरेको वेदकोटले निर्धारित २० ओभरमा ९ विकेट गुमाउँदै १ सय १८ रन बनाएको थियो ।

वेदकोटका लागि विशाल बोहराले सर्वाधिक ३६ रन बनाए । दिपक बोहराले २४ रन बनाउँदा कृष्ण बिष्ट १७ रनमा अविजित रहे । महेश बिष्ट १६ रनमा पवेलियन फर्किए ।

त्रिवेणीका लागि दिपक टमाट्टाले ४ ओभरमा १६ रन खर्चिएर ५ विकेट लिए । दिपक प्लेयर अफ दी म्याच चुनिए । त्यस्तै लोकेन्द्र चन्दले २ विकेट लिदा विशाल आचार्यले १ विकेट लिए ।

केपिएलको तेश्रो संस्करणमा १२ टोलीको सहभागिता छ । सहभागी टोलीलाई ४ समूहमा विभाजित गरिएको छ । प्रतियोगिताको विजेता टोलीले २ लाख, दोस्रो टोलीले १ लाख रुपैयाँ प्राप्त गर्नेछ।

सर्वोत्कृष्ट खेलाडीले २५ हजार, बेष्ट बलर र ब्याटरले समान १५ हजार, उदयमान खेलाडीले १० हजार र प्रत्येक खेलको प्लेयर अफ दी म्याचले २ हजार ५ सय रुपैयाँ प्राप्त गर्ने आयोजक जिल्ला क्रिकेट संघ कैलालीले जनाएको छ । प्रतियोगिता फागुन १४ गते सकिनेछ ।