काठमाडौं(हाम्रो खेलकुद) – धनगढीको फाप्लामा जारी कैलाली प्रिमियर लिग – ३ को उपाधिका लागि कञ्चनपुरकै दुई टोली पुनर्वास नगरपालीका बी र भिमदत्त भिड्ने भएका छन् ।

मंगलबार भएको पहिलो सेमिफाइनलमा कैलालीको गोदावरी नगरपालिकाको टिम अनुपस्थित भएपछि वाकओभर पाएर कञ्चनपुरको पुनर्वास बी फाइनलमा प्रवेश गरेको छ ।

टसको समयसम्म गोदावरीको टिम मैदानमा नआएपछि वाकओभर मार्फत पुनर्वास ‘बी’ फाइनलमा प्रवेश गरेको हो ।

प्रधानमन्त्री कपको प्रदेश छनोटका लागि खेलाडी बैतडी गएपछि खेलाडी अपुग भएर सेमिफाइनल छोड्नु परेको गोदावरी नगरपालिकाको टोलीका म्यानेजर रमेश कडायतले बताए ।

त्यस्तै दोश्रो सेमिफाइनलमा बाजुराको त्रिवेणी नगरपालिकालाई ३२ रनले पराजित गर्दै कञ्चनपुरको भिमदत्त फाइनलमा प्रवेश गरेको हो ।

१ सय ३३ रनको लक्ष्य पछ्याउने क्रममा त्रिवेणीले १९.१ ओभरमा अलआउट हुँदै १ सय रन मात्र बनाउन सक्यो ।

फाइनल खेल फागुन १४ गते बुधवार दिउँसो १ बजेदेखि धनगढीको फाप्ला मैदानमा हुनेछ । जिल्ला क्रिकेट संघ कैलालीको आयोजनामा सञ्चालन भैरहेको एसपिए कैलाली प्रिमियर लिगको यो तेश्रो संस्करण हो ।

प्रतियोगीताको विजेता टोलीले २ लाख, उपविजेता टोलीले १ लाख, सर्वोत्कृष्ट खेलाडीले २५ हजार, बेष्ट बलर र ब्याटरले जनही १५ हजार, उदयमान खेलाडीले १० हजार रुपैयाँ प्राप्त गर्नेछन्।