काठमाडौं(हाम्रो खेलकुद) – नन्दन यादवको अलराउण्ड प्रदर्शनमा प्रधानमन्त्री कप राष्ट्रिय पुरुष क्रिकेट प्रतियोगिताको बागमती छनोटमा ललितपुर जिल्लाले विजयी सुरुआत गरेको छ ।

मुलपानीमा मंगलवार भएकाे खेलमा ललितपुरले काठमाडौं जिल्लालाई ५९ रनले पराजित गरेको हो । २ सय २८ रनको लक्ष्य पछ्याएको काठमाडौं ४२.३ ओभरमा १ सय ६८ रनमै समेटियो ।

काठमाडौंका लागि सोनु देवकोटाले ४८ बल खेल्दै सर्वाधिक ४० रन जोडे । जभ्याङ लामा ५५ बलमा २८ र प्रशिद्ध जैसी ४० बलमा १९ रन बनाए ।

ललितपुरका लागि सूर्य तामाङले ३, रोनिम तिवारी र नन्दनले समान २ विकेट लिए ।

त्यसअघि मुलपानी अन्तर्राष्ट्रिय क्रिकेट मैदानमा टस जितेर ब्याटिङ रोजेको ललितपुरले निर्धारित ५० ओभरमा ९ विकेट गुमाउँदै २ सय २७ रन बनाएको थियो ।

ललितपुरका लागि आदिल खानले ७७ बलमा सर्वाधिक ६२ रन जोडे । प्लेयर अफ द म्याच भएका नन्दन यादवले ८० बलमा ५४ रन बनाए । विवेक रानामगरले ४८ बलमा २९ रन थपे ।

काठमाडौंका लागि कप्तान प्रतिश जिसीले १० ओभरमा ६० रन खर्चिएर ५ विकेट लिए । सोनु देवकोटाले २ र निश्चल श्रेष्ठले १ विकेट लिए ।

उता, चितवनमा भएको अर्को खेलमा मकवानपुर जिल्लाले चितवनलाई ७१ रन हरायो ।

१ सय ४४ रनको लक्ष्य पछ्याएको चितवन ३१.४ ओभरमा ७२ रनमै समेटियो । चितवन प्रतिक श्रेष्ठले १४, रोशन झाले १२ र विकलकुमार गुप्ताले ११ रन बनाए ।

मकवापुरका लागि साकार गजुरेलले ३, असिम श्रेष्ठ र खेलको प्लेयर अफ द म्याच भएका रिजन ढकालले समान २ विकेट लिए ।

त्यसअघि टस हारेर ब्याटिङको निम्तो पाएको मकवानपुर ४८.५ ओभरमा १ सय ४३ र बनायो । मकवानपुरका सुमन सुनारले सर्वाधिक ४९ रन जोडे । गौरव खड्काले १९ र तक्षक सिम्खडाले १४ रन बनाए ।

चितवनका लागि दिपेश श्रेष्ठले ४, विशाल खत्रीले २ र प्रशान्त महतले १ विकेट लिए ।