काठमाडौं(हाम्रो खेलकुद) – नन्दन यादवले अलराउण्ड प्रदर्शनको सहयोगमा प्रधानमन्त्री कप बागमती प्रादेशिक छनोट प्रतियोगितामा ललितपुरले लगातार दोस्रो जित हासिल गरेको छ ।

लगातार दोश्रो जित दर्ता गर्ने क्रममा ललितपुरले भक्तपुरमाथि ९६ रनको जित हात पारेको हो । ललितपुरले दिएको २ सय ८४ रनको लक्ष्य पछ्याएको भक्तपुरले निर्धारित ५० ओभरमा ९ विकेट गुमाएर १ सय ८७ रन मात्र बनायो ।

भक्तपुरका लागि सक्रिय प्रताप कार्कीले ८४ बलमा सर्वाधिक ७४ रन जोडे । गौरभ पौडेलले ८७ बलमा ६० तथा त्रिशान चौलागाईंले ३७ बलमा १६ रन जोडे । ललितपुरका लागि नन्दनले ३, विपिन आचार्यले २ र तिलक राज भण्डारीले १ विकेट लिए । सुबाश खत्रीले २ विकेट लिए।

त्यसअघि मुलपानी क्रिकेट मैदानमा टस हारेर ब्याटिङको निम्तो पाएको ललितपुरले ५० ओभरमा ८ विकेट गुमाएर २ सय ८३ रन जोड्यो । ललितपुरका लागि प्लेयर अफ द म्याच समेत भएका नन्दनले प्रतियोगितामा लगातार दोस्रो अर्धशतक प्रहार गरे ।

नन्दनले लगातार दोश्रो अर्धशतक बनाउने क्रममा सर्वाधिक ८४ रन बनाए । नन्दन ५७ बलमा नट आउट रहे । नन्दनले अघिल्लो खेलमा काठमाडौँ विरुद्ध पनि ५४ रन बनाउनुको साथै २ विकेट लिएका थिए । उनि लगातार दोश्रो खेलमा प्लेयर अफ द म्याच समेत घोषित भए।

आदील खान र आशुतोष घिरैयाले समान ४७ रन जोडे । भक्तपुरका लागि सुवास खत्रीले २ तथा कृष कार्की र समन हुमागाईंले समान १ विकेट लिए ।

यस्तै, आजै घरेलु मैदानमा भएको खेलमा चितवन जिल्लाले पहिलो जित हात पार्यो । पहिलो खेलमा मकवानपुरसँग पराजित बुधवार भएकाे खेलमा चितवनले नुवाकोटलाई ४० रनले पराजित गर्यो ।

चितवनले दिएको १ सय ४७ रनको लक्ष्य पछ्याएको नुवाकोटले ३१.४ ओभरमा १ सय ६ रन मात्र बनाउन सक्यो ।

नुवाकोटका लागि योगेश भाटले ४९ बलमा सर्वाधिक २८ रन जोडे । दीनेश सुवेदीले ३३ बलमा २१ तथा अभिराज यादवले १० रन जोडे । चितवनका लागि गौतम केसीले ४, दिपेश श्रेष्ठ र संघर्ष पौडेलले समान २ विकेट लिए ।

त्यसअघि टस हारेर पहिले ब्याटिङ गरेको चितवन ४१.२ ओभरमा १ सय ४६ रनमा समेटियो । चितवनका लागि कप्तान दिपेश श्रेष्ठले ६२ बलमा सर्वाधिक ४८ रन जोडे । क्रिजन गुरुङले ४३ बलमा २२ र प्रशान्त महतले ४७ बलमा २१ रन जोडे ।

नुवाकोटका लागि अभिराज यादवले ३ तथा गणेश गौतम र सुशील साउदले समान २ विकेट लिए । अलराउण्ड प्रदर्शन गर्दै चितवनलाई जित दिलाएका कप्तान दीपेश प्लेयर अफ द म्याच भए ।