काठमाडौं(हाम्रो खेलकुद) – धनगढीमा सम्पन्न तेश्रो संस्करणको एसपिए कैलाली प्रिमियर लिग(केपिएल) को उपाधि भिमदत्त नगरपालिकाले जितेको छ ।

बुधबार भएको फाइनल खेलमा पुनर्वास नगरपालिकालाई ५ विकेटले पराजित गर्दै भिमदत्तले उपाधिमाथि जितेको हो । भिमदत्तलाई उपाधि दिलाउन साजन बिटालु र प्रकाश पायडेयले ९३ रनको अर्धशतकीय साझेदारी गरे ।

बिटालुले ६७ तथा पाण्डेयले ५४ रनको अविजित अर्धशतकीय पारी खेले । भिमदत्त नगरपालिकालका लागि मिलन बोहराले ३४ रनको योगदान दिए । पुनर्वास नगरपालिकाका लागि भोजराज भट्टले ३, कृष्ण कार्की र सागर भण्डारीले समान १ विकेट लिए ।

त्यसअघि टस जितेर पहिला ब्याटिङ गरेको पुनर्वास बी ले निर्धारित २० ओभरमा ५ विकेट गुमाउँदै १ सय ६९ रन बनायो । पुनर्वासका लागि बसन्त सिंह कार्कीले ४० बलको सामना गर्दै ७ चौका र ४ छक्काको मद्दतले नट आउट ७२ रनको बनाए । त्यस्तै कप्तान विपिन रावल ३८, सुवास ऐर १८, नवयुग बस्नेत १४ रनमा आउट भए ।

भिमदत्त नगरपालिकाका लागि साजन बिटालु, किरन चन्द, सन्तोष भट्ट र समिर बिष्टले समान १ विकेट लिए । प्रतियोगितामा भिमदत्तका अरुण ऐरी सर्वोकृष्ट खेलाडी भए । उनले नगद २५ हजार प्राप्त गरे । पुर्नवासका दिपक बोहोरा उत्कृष्ट ब्याटर भए । उनले नगद १५ हजार पाए ।

त्रिवेणी नगरपालिकाका दिपक टमट्टा उत्कृष्ट बलर भए । उनले पनि नगद १५ हजार प्राप्त गरे । धनगढी उपमहानगरपालिका मनिस जोशी उदयमान खेलाडी भए । उनले नगद १० हजार प्राप्त गरे ।