एजेन्सी – अस्ट्रेलिया आइसिसी च्याम्पियन्स ट्रफी क्रिकेटको सेमिफाइनलमा पुगेको छ । समूह ‘बी’ मा शुक्रवार अफगानिस्तानसँगको खेल वर्षाका कारण नतिजाविहीन बनेपनि अस्ट्रेलिया ४ अंकसहित अन्तिम चारमा पुगेको हो ।

अस्ट्रेलिया १६ वर्षपछि सेमिफाइनलमा पुगेको हो । सन् २००९ मा उपाधि जितेकलो अस्ट्रेलियाले २०१३ र २०१७ को च्याम्पियन्स ट्रफीमा कुनैपनि खेल जितेन ।

पाकिस्तानको लाहोरमा आज २ सय ७४ रनको लक्ष्य पछ्याएको अस्ट्रेलियाले दमदार सुरुवात गर्दै १२.५ ओभरमा १ विकेट गुमाएर १ सय ९ रन बनाउँदा वर्षाले खेल रोकिएको थियो।

ट्राभिस हेड ५९ र स्टिभ स्मिथ १९ रनमा नआउट रहे । म्याट शर्ट २० रनमा आउट भए ।

त्यसअघि टस जितेर पहिला ब्याटिङ गरेको अफगानिस्तानले  ५० ओभरमा सबै विकेट गुमाएर २ सय ७३ रन बनाएको थियो।

सदिकुल्ला अटल‌ र अजमतुल्लाले अर्धशतकीय इनिङ खेले । सदिकुल्लाले ९५ बलमा ६ चौका र ३ छक्काको मद्दतमा‌ ८५ रन बनाए‌। अजमतुल्लाले ६३ बल १ चौका र ५ छक्कासहित ६७ रन जोडे ।

कप्तान हस्मातुला शाहिदीले २०, ओपनर इब्राहिम जाद्रनले २२, रसिद खानले १९, रहमत शाहले‌ १२ रन बनाए। अन्य खेलाडीले दोहोरो अंकमा रन जोड्न सकेनन्।

अस्ट्रेलियाका बेन द्वारस्विसले ३, स्पेन्सर जोन्सन, एडन जाम्पाले समान २ तथा नाथन इल्स र ग्लेन म्याक्सवेलले समान १ विकेट लिए।

अब समूह बी बाट अफगानिस्तानको झिनो गणितिय सम्भावना बाँकी नै रहँदा इंग्ल्याण्ड र दक्षिण अफ्रिकाबिचको खेलपछि सेमिफाइनल समीकरण पूरा हुनेछ ।

शनिवार हुने खेलमा दक्षिण अफ्रिका विजयी भएमा समूह विजेता बन्नेछ । इङ्ग्ल्याण्डले सामान्य अन्तरको जित निकाल्दा पनि दक्षिण अफ्रिका नै सेमिफाइनलमा पुग्नेछ । इङ्ग्ल्याण्डले निकै फराकिलो अन्तरको जित निकाले मात्र अफगानिस्तानको सम्भावना रहन्छ ।

समूह एबाट न्युजिल्याण्ड र भारत सेमिफाइनल पुगिसकेका छन् भने पाकिस्तान र बंगलादेश प्रतियोगिताबाट बाहिरिसकेको छ।