काठमाडौं(हाम्रो खेलकुद) – विभागीय टोली त्रिभुवन आर्मी क्लबले प्रधानमन्त्री कप (पिएम) राष्ट्रिय पुरुष एकदिवसीय क्रिकेट प्रतियोगितामा लगातार दोस्रो जित हासिल गरेको छ ।

रुपन्देहीमा बुधवार भएको खेलमा आर्मीले सुदूरपश्चिम प्रदेशविरुद्ध ८ विकेटको जित नकालेको हो । सुदूरपश्चिमले दिएको १ सय १८ रनको लक्ष्य आर्मीले २३.५ ओभरमा २ विकेट गुमाउँदै पूरा गर्यो ।

आर्मीका लागि सन्तोष कार्कीले ६३ बलमा १० चौकाको मद्दतमा नट आउट रहँदै सर्वाधिक ५५ रनको योगदान गरे । तृतराज दासले ३१ रनमा आउट हुँदा कप्तान विनोद भण्डारीले २० रनमा नट आउट रहे ।

ओपनर सन्तोषले तेस्रो विकेटका लागि विनोदसँग नट आउट ६१ र पहिलो विकेटका लागि तृतराजसँग ५३ रनको साझेदारी गरे । सुदूरपश्चिमका लागि शेर मल्ल र मिलन बोहराले समान विकेट लिए ।

त्यसअघि सिद्धार्थ क्रिकेट मैदानमा टस जितेर ब्याटिङ रोजेको सुदूरपश्चिमले ४५.३ ओभरमा १ सय १७ रनको योगफलमा समेटिएको थियो ।

सुदूरपश्चिमका लागि निश्चल क्षेत्रीले १ सय २१ बलमा २ चौकाको मद्दतले नट आउट सर्वाधिक ४९ रन जोडे । यसैगरी सुनिल चन्द र कप्तान नारायण जोशीले समान १६ रन बनाए । सुदूरपश्चिमका अन्य ब्याटरले दोहोरो अंकमा रन जोड्न सकेनन् ।

आर्मीका लागि शहाब आलमले ४, सोमपाल कामीले २ तथा आकाश चन्द, नरेन साउद, बसिर अहमद र कुशल मल्लले समान १ विकेट लिए ।

जितसँगै आर्मीले २ खेलमा ४ अंक जोडेको छ । पराजित सुदूरपश्चिमको ३ खेलबाट २ अंक छ । आर्मीले पहिलो खेलमा बागमतीलाई हराएको थियो । पहिलो खेलमा कर्णालीसँग हार बेहोरेको सुदूरपश्चिमले गण्डकीलाई भने पराजित गरेको थियो ।