काठमाडौं (हाम्रो खेलकुद)- वुमन्स डे अन्तराष्ट्रिय क्रिकेट सिरिजमा नेपाल नामिबियासँग २३ रनले पराजित भएको छ।

फितलो ब्याटिङ नै नेपालको हारको प्रमुख कारण बन्यो। सिरिजमा नेपालको यो तेस्रो हार हो।

जितको लागि १ सय २६ रनको लक्ष्य पछाएको नेपाल २० ओभरमा ५ विकेट गुमाउँदै १ सय २ रनमा समेटियो। नेपालको लागि साना प्रविणले ३१ रन बनाइन्।

कविता जोशीले १७ तथा कप्तान इन्दु बर्मा र पूजा महतोले समा १५ रन बनाए। यी ४ बाहेक अन्यले दोहोरो रन छुन सकेनन्। बलिङमा इभिलिन केजारूकुवाले २ विकेट लिइन्।

त्यसअघि टस जितेर नेपालले पहिले नामिबियालाई ब्याटिङको लागि उतार्यो। २० ओभरमा ८ विकेट गुमाउँदै १‌ सय २५ रनको योगफल खडा गर्यो।

नामिबियाको लागि यासमिन खानले सर्वाधिक ४५ रन बनाइन्। ४४ बलको सामना गर्दै ५ चौका प्रहार गर्दै ४५ रन जोडिन्।

विल्का ब्याटिङ २० रन र सुने विटम्यानले १५ रन बनाउँदा जुरेन डिरगार्टले अविजत १६ रनमा क्रिजमा रहिन्। बलिङमा ईस्वरी बिष्टले ३ र रश्मी चौधरीले २ विकेट झारे।

नेपालको यो तेस्रो हार हो। नेपाल नामिबियासँग हारेको यो दोस्रो पटक हो। यस्तै नेपाल हङकङसँग २ रनले हारेको थियो। नेपालले युगान्डालाई भने हराएको थियो।

अब नेपालले हङकङसँग भोलि खेल्नेछ।