काठमाडौं(हाम्रो खेलकुद) – विभागीय टोली त्रिभुवन आर्मी क्लबले प्रधानमन्त्री कप (पिएम) राष्ट्रिय पुरुष एकदिवसीय क्रिकेट प्रतियोगितामा अपराजित यात्रा कायमै गरेको छ ।

पिएम कपमा लगातार तेस्रो जित हासिल गर्ने क्रममा आर्मीले बिहीवार कर्णाली प्रदेशविरुद्ध १ सय २७ रनको सहज जित निकालेको हो ।

२ सय ६३ रनको लक्ष्य पछ्याएको कर्णाली ३७.१ ओभरमा १ सय ३५ रनमा समेटियो । कर्णालीका लागि प्रकास जैशीले नट आउट रहँदै सर्वाधिक ५० रन जोडे । ७२ बलको सामना गरेका उनले २ चौका र ४ छक्का प्रहार गरे ।

विपिन रावल २३, दिनेश अधिकारी २२ तथा विपिन शाही १२ रनमा आउट भए । आर्मीका लागि शाहब आलमले ३, कुशल मल्ल, सोमपाल कामी र आकाश चन्दले समान २ विकेट लिए ।

त्यसअघि भैरहवामा रहेको एक्स्ट्रा टेक क्रिकेट मैदानमा टस हारेर ब्याटिङ गरेको आर्मीले निर्धारित ५० ओभरमा ९ विकेट गुमाएर २ सय ६२ रन जोडेको थियो ।

आर्मीका लागि ओपनर तृतराज दासले सर्वाधिक ६९ रन जोडेका थिए । प्लेयर अफ द म्याच समेत भएका तृतले ८४ बलको सामना गर्दै १० चौका प्रहार गरेका थिए ।

कप्तान विनोद भण्डारीले ६४ बलमा ४ चौका र २ छक्काको सहयोगमा ५६ रन जोडेका थिए । बसिर अहमद ३६ बलमा ३६, भीम सार्की ७२ बलमा ४० तथा सोमपाल कामी १३ रन बनाएर आउट भए ।

कर्णालीका लागि प्रकाश जैसीले ४, दीनेश अधिकारीले ३ तथा सुनिल धमलाले २ विकेट लिए । ३ खेलमा लगातार जितसँगै आर्मीले ६ अंक जोडेको छ । आर्मीले पहिलो खेलमा बागमतीलाई तथा दोस्रोमा सुदूरपश्चिमलाई हराएको थियो ।

पहिलो खेलमा सुदूरपश्चिमलाई भने पराजित गरेको कर्णालीले त्यस पछिका २ खेलमा हार बेहारेको छ । कर्णालीको ३ खेलबाट २ अंक छ ।