काठमाडौं(हाम्रो खेलकुद) – लुम्बिनी प्रदेश प्रहरीलाई पराजित गर्दै मधेश प्रदेश प्रहरी कार्यालयले प्रथम आइजिपी कप क्रिकेट प्रतियोगिताको उपाधि जितेको छ ।

मधेशले शनिवारको‌ भएको फाइनलमा लुम्बिनीलाई १४ रनले पराजित गर्दै उपाधि जितेको हो । १ सय ६८ रनको लक्ष्य पछ्याएको लुम्बिनीले २० ओभरमा ९ विकेट गुमाएर १ सय ५३ रन मात्र जोड्न सक्यो ।

लुम्बिनीका लागि कृष्णले २८ बलमा ३ चौका र १ छक्कासहित सर्वाधिक ३२ रन जोडे । सुरज धितालले ११ बलमा ३ छक्काको सहयोगमा २५ रन बनाए।

युवराज सेन ओली २५ बलमा २२, दीपेन्द्र थापा १९ बलमा १६ तथा सबिर अहमद १९ रन जोडे । मधेशका लागि मुनाल यादव र युवराज शर्माले समान २ तथा दीपेश रायले १ विकेट लिए ।

त्यसअघि मुलपानी क्रिकेट मैदानमा टस जितेर ब्याटिङ रोजेको मधेशले निर्धारित २० ओभरमा अल आउट हुँदै हुदै १ सय ६७ रनको योगफल तयार गर्यो ।

मधेशका लागि मुनाल यादवले १७ बलको सामना गर्दै १ चौका र ३ छक्कासहित सर्वाधिक ३२ रन जोडे ।कप्तान कमलेश मण्डल धानुकले २६ बलमा ३ चौकाको सहयोगमा २९ रन बनाए ।

दिपेश राय ११ बलमा १ चौका र २ छक्काको सहयोगमा २२ रन जोड्दै आउट भए । हेमु यादव ३० बलमा २२ तथा संजय साह २५ रनमा आउट भए ।

लुम्बिनीका लागि रोहित धलालले ३, अनुप कुमार निशाद र युवराज सेन ओलीले समान २ तथा रविन गौडेल र सुरज धितालले समान १ विकेट लिए ।

प्रतियोगितामा लुम्बिनी प्रदेशका युवराज सेन ओली सर्वोत्कृष्ट खेलाडी घोषित भए। मधेशका दीपेश राय उत्कृष्ट ब्याटर र सुदूरपश्चिमका पशुपती मल्ल उत्कृष्ट बलर चुनिए ।