काठमाडौं(हाम्रो खेलकुद) – गण्डकी प्रदेशले प्रधानमन्त्री (पिएम) एकदिवसीय राष्ट्रिय प्रतियोगितामा लज्जास्पद ब्याटिङ गरेको छ ।

कोशीविरुद्धको जारी खेलमा गण्डकी ३१ रनमा अल आउट भएको हो । भैरहवाको एक्स्ट्रा टेक ओभलमा टस जितेर ब्याटिङ रोजेको गण्डकी २०.४ ओभरमा अल आउट भएको‌ हो ।

यो पिएम कपको इतिहासमा पहिलो इनिङमा बनेको सर्वाधिक कम योगफल हो । यसअघि सन् २०१९ को पिएम कपको दोस्रो सेमिफाइनलमा नेपाल एपिएफ क्लब नेपाल पुलिस क्लबविरुद्ध ४१ रनमा समेटिएको थियो ।

कोशीविरुद्ध गण्डकीका कुनै ब्याटरले पनि दोहोरो अंकमा रन जोड्न सकेनन् । गण्डकीका लागि युवा ओपनर अर्जुन कुमालले बनाएको ९ रन नै सर्वाधिक हो । गण्डकीका ४ ब्याटरले रनको खाता खोल्न नै सकेनन् ।

कोशीका लागि विपिन महतोले ८ ओभर बलिङ गर्दै १७ रन खर्चिएर ६ विकेट लिन सफल भए । फिर्दोस अन्सारीको नाममा ३ तथा दीपेश कंडेलको नाममा १ विकेट रह्यो ।

कोशी ४ खेल खेलिसक्दा सबै खेलमा पराजित हुदै अंक बिहिन छ । गण्डकीले भने खेलेको ३ मध्ये १ खेलमा जित हात पारेको छ । गण्डकीले कर्णाली प्रदेशलाई हराएको थियो ।

१० टोली सहभागिता रहेको‌ प्रगियोगिता सिङ्गल राउण्डमा हुनेछ । लिग चरणको खेलमा शीर्ष २ मा रहने टोलीका बीचमा फाइनल हुनेछ ।