हिमाल खरेल,मेचीनगर

पेनोरिस ११ ले इन्डो–नेपाल टि ट्वान्टी क्रिकेट प्रतियोगिताको उपाधि जितेको छ ।

आज भएको फाइनलमा थन्डर्स ११ लाई ७ विकेटले पराजित गर्दै पेनोरिस ११ च्याम्पियन बनेको हो ।

मेचीनगर ४ बाहुनडाँगीस्थित सरस्वती माविको खेल मैदानमा टस जितेर पहिले ब्याटिङ गरेको थन्डर्सले २० ओभरमा ९ विकेटको क्षतिमा ९१ रन मात्र बनाउन सक्यो ।

थन्डर्सका लागि रोहित राजवंशीले ३५ बलमा १९ , आयुष न्यौपानेले १४ र आशिक राना मगरले १३ रन बनाए । अन्य ब्याटरले दोहोरो अंक जोड्न सकेनन् । थन्डर्सका दुईजना ब्याटर शून्यमा आउट भए ।

बलिङतर्फ पेनोरिसका राकेश रोय, सुनिल घोष, बोनोमली रोय र आचरल प्रधानले समान २ र सन्दिप प्रसादले १ विकेट लिए ।

९२ रनको सामान्य लक्ष्य पाएको पेनोरिस ११ ले ९.५ ओभरमा ३ विकेटको क्षतिमा जित निकालेको थियो । पेनोरिसका ओपनरद्वय शुभांकर देवनाथले अर्धशतकीय इनिङ खेलेका थिए ।

शुभांकर २४ बलमा ५२ रन जोडे । कञ्चन उप्रेतीले १५ रन बनाए । थन्डर्सका शिव राजवंशीले २ र विराट डाँगीले १ विकेट लिए ।

विजेता पेनोरिस–११ ले ५० हजारसहित ट्रफी र दोस्रो टोलीले थन्डर्स–११ ले ३० हजार रुपैयाँ प्राप्त गर्यो ।

पेनोरिसका शुभांकर देवनाथ फाइनल अफ दि म्याच घोषित भए । उनले १ हजार रुपैयाँ र मायाको चिनो प्राप्त गरे ।

प्रतियोगितामा ७ विकेट तथा ७८ रन बनाएका थन्डर्सका रोहित राजवंशी प्लेयर अफ द सिरिज घोषित भए । उनले ५ हजार रुपैयाँसहित ट्रफी हात पारे ।

समापन कार्यक्रममा पूर्वीगर्जन डटकमका सम्पादक प्रविण अधिकारीलाई सम्मान गरिएको छ ।

साना किसान कृषि सहकारी संस्था बाहुनडाँगीको प्रायोजन रहेको प्रतियोगिता सम्पन्न गर्न विद्या विकास एकाडेमी बाहुनडाँगी जेसिजलगायतको सहयोग रहेको थियो ।