एजेन्सी – इण्डियन प्रिमियर लिग(आइपिएल) को आफ्नो पहिलो खेलमा नियमित कप्तान हार्दिक पाण्ड्याको अनुपस्थितीमा मुम्बई इन्डियन्सको कप्तानी सुर्यकुमार यादवले गर्ने भएका छन् ।

मुम्बईका मुख्य प्रशिक्षक महेला जयवर्धनेले बुधबार मुम्बईमा आयोजित पत्रकार सम्मेलनमा सुर्यकुमारले पहिलो खेलमा कप्तानी गर्ने बताएका हुन् । नियमित कप्तान हार्दिक पाण्ड्यालाई सन् २०२४ को आइपिएलको अन्तिम खेलमा स्लो ओभर रेटका कारण १ खेलको प्रतिबन्ध लागेको थियो ।

‘यो मेरो नियन्त्रण भन्दा बाहिर छ। गत वर्ष जे भयो त्यो खेलको एक हिस्सा हो । हामीले अन्तिम ओभर डेढ–दुई मिनेट ढिला बलिङ गयौं,’ हार्दिकले भने ‘त्यतिबेला मलाई यसको परिणाम थाहा थिएन । यो दुर्भाग्यपूर्ण छ, तर म प्रक्रिया अनुसार नै जानुपर्छ ।’

टी–२० आईमा सुर्यकुमार भारतको समेत कप्तान हुन् । मुम्बईको पहिलो खेल २३ मार्चमा चेन्नई सुपर किंग्ससँग चेन्नईमा हुनेछ । मुम्बई यस खेलमा हार्दिक र जसप्रित बुमराहबिना नै मैदान उत्रनेछ ।

बुमराह ढाडको चोटका कारण पहिलो खेल गुमाउने पक्का भइसकेको छ । चोटका कारण नै बुमराह जनवरीदेखि मैदानबाहिर रहेका छन् । बुमराहले अझ केही खेल गुमाउने अनुमान गरिएको छ ।

सन् २०२४ को आइपिएलको अन्तिम लिग खेलमा लखनउ सुपर जायन्ट्सविरुद्ध मुम्बईको स्लो ओभर रेटका कारण हार्दिकलाई प्रतिबन्ध लागेको थियो । यो सिजनको तेस्रो पटक यो कारण दोहोरिएकाले हार्दिकलाई लगत्तैको आइपिएलको अर्को खेलका लागि प्रतिबन्ध र ३० लाख भारु जरिवाना गरिएको थियो ।

उनी मार्च २९ मा अहमदाबादमा गुजरात टाइटन्सविरुद्ध मुम्बईको दोस्रो खेलका लागि उपलब्ध हुनेछन् । मुम्बईले पहिलो घरेलु खेल मार्च ३१ मा कोलकाता नाइट राइडर्ससँग खेल्नेछ । सन् २०२४ को आइपिएलमा मुम्बईले १४ मध्ये ४ खेलमा मात्र जित हात पारेको थियो ।