काठमाडौं(हाम्रो खेलकुद) – कर्णाली प्रदेशले प्रधानमन्त्री(पिएम) कप एकदिवसीय राष्ट्रिय क्रिकेट प्रतियोगितामा लुम्बिनीविरुद्ध प्रतिस्पर्धात्मक योगफल तयार गरेको छ ।

जारी खेलमा अर्जुन घर्ती र दीपेन्द्र रावतको अर्धशतकको सहयोगमा कर्णालीले लुम्बिनीविरुद्ध २ सय ५ रनको प्रतिस्पर्धात्मक योगफल तयार गरेको छ । सिद्धार्थ क्रिकेट मैदानमा टस जितेर पहिले ब्याटिङ गरेको कर्णाली ४८.५ ओभरमा २ सय ५ रनको योगफल तयार गर्यो ।

कर्णालीका लागि दीपेन्द्र रावतले सर्वाधिक ६६ रन जोडे । उनले ८४ बलमा ९ चौका प्रहार गरे । एक समय ६ विकेट गुमाएर ५६ रन मात्र जोडेर खराब स्थितीमा पुगेको कर्णालीका लागि सातौं विकेटका लागि दीपेन्द्र रावतले अर्जुन घर्तीसँग मिलेर १ सय २ रनको साझेदारी गरे । अर्जुन ८४ बलमा ३ चौका र २ छक्काको सहयोगमा ५६ रन जोड्दै आउट भए ।

ओपनर सुनिल धमला १९ तथा दिनेश अधिकारी १७ बलमा ३ चौकाको सहयोगमा १६ रन बनाउँदै आउट भए । निश्चल रावल ११ तथा विपिन रावल १० रनमा आउट भए ।

लुम्बिनीका लागि रमेश कुर्मीले ३, विप्रसन केसी, निर्मल गुरुङ र अजय चौहानले समान २ तथा कप्तान देव खनालले १ विकेट लिए । प्रतियोगितामा ६ खेलमा ८ अंकका साथमा तेस्रो स्थानमा छ । ५ खेलमा ४ अंक जोडेको कर्णाली पाँचौ स्थानमा छ ।