एजेन्सी – इन्डियन प्रिमियर लिग (आइपिएल) २०२५ को पहिलो तीन खेलमा राजस्थान रोयल्सको कप्तानी रियान परागले सम्हाल्ने भएका छन् ।

नियमित कप्तान सन्जु स्यामसनले विकेटकिपिङ र फिल्डिङका लागि अनुमती नपाएका कारण ब्याटरका रुपमा मात्र खेल्ने भएपछि परागले कप्तानीको अवसर पाएका हुन् । गत महिना औंलाको शल्यक्रिया गरेका स्यामसन बेंगलुरुको रिह्याब सेन्टरमा रहेपछि सोमवार राजस्थानको टोलीमा सामेल भएका थिए । उनले आइपिएलमा इम्प्याक्ट सबको रूपमा खेल्ने सम्भावना छ ।

ध्रुव जुरेललाई विकेटकिपिङको जिम्मेवारी सम्हाल्ने देखिन्छ । स्यामसनलाई फेब्रुअरीमा भएको इङ्ग्ल्याण्डविरुद्धको पाँचौं टि ट्वान्टीमा जोफ्रा आर्चरको बलमा औंलामा चोट लागेको थियो ।

पूर्ण रुपमा फिट भएपछि स्यामसन कप्तानको रुपमा पुनरागमन गर्ने राजस्थानले जनाएको छ । परागले भने आइपिएलमा पहिलो पटक कप्तानी गर्नेछन् । उनी सन् २०१९ देखि राजस्थानको टोलीमा छन् । गत वर्षको मेगा लिलामीअघि फ्रेन्चाइजले उनलाई १४ करोड भारुमा रिटेन गरेको थियो ।

सन् २०२४ को आइपिएलमा उनले ५ सय ७३ रन बनाएका थिए । जुन राजस्थानको ब्याटरद्वारा सर्वाधिक र समग्र लिगमा तेस्रो उच्च स्कोर थियो । जसले उनलाई भारतका लागि टि ट्वान्टी आईमा डेब्यु गर्ने अवसरसम्म पुर्याएको थियो ।

परागले मार्च २३ मा सनराइजर्स हैदरावादसँग पहिलो पटक कप्तानी गर्दै गुवाहाटीमा २६ मार्चमा डिफेन्डिङ च्याम्पियन कोलकाता नाइट राइडर्स र ३० मार्चमा चेन्नई सुपर किंग्सविरुद्ध पनि टोलीको नेतृत्व गर्नेछन् ।