काठमाडौं(हाम्रो खेलकुद) – कर्णाली प्रदेशले प्रधानमन्त्री(पिएम) कप एकदिवसीय राष्ट्रिय क्रिकेट प्रतियोगितामा लुम्बिनीविरुद्ध रोमाञ्चक जित हासिल गरेको छ ।

बिहीवार भएको खेलमा अर्जुन घर्ती र दीपेन्द्र रावतको अर्धशतकको सहयोगमा कर्णालीले दिएको २ सय ६ रनको लक्ष्य पछ्याएको लुम्बिनी प्रदेश ४९.४ ओभरमा २ सय रनमा समेटियो ।

लुम्बिनीका लागि प्रज्वल थापाले सर्वाधिक ८४ रन जोडे । उनले १ सय ७ बलको सामना गर्दै ६ चौका प्रहार गरे । अन्तिम ओभरमा जितका लागि लुम्बिनीलाई ८ रन चाहिएकोमा १ विकेट मात्र बाँकी रहेको थियो ।

कर्णालीका लागि बलिङमा आएका दिनेश अधिकारीले ४ बलमा नै विकेट लिदै खेल जिताए । चौथो विकेटका लागि कप्तान देव खनालसँग मिलेर प्रज्वलले ९४ रनको साझेदारी गरे ।

कप्तान देव ६० बलमा ४ चौकाको सहयोगमा ४० रनमा आउट भए । १ सय ४५ रनमा ३ विकेट गुमाएर सहज जिततर्फ अघि बढेको लुम्बिनीले ५५ रन जोड्दा बाँकी रहेको ७ विकेट गुमाउन पुग्यो ।

आकाश त्रिपाटी २१ तथा मनिष थापा १६ रनमा आउट भए । कर्णालीका लागि दिनेश अधिकारी र दीपेन्द्र रावतले समान ३, प्रकास जैशीले २ तथा सुनिल धमला र कप्तान दिवान पुनले समान १ विकेट लिए ।

त्यसअघि सिद्धार्थ क्रिकेट मैदानमा टस जितेर पहिले ब्याटिङ गरेको कर्णाली ४८.५ ओभरमा २ सय ५ रनको योगफल तयार गरेको थियो ।

कर्णालीका लागि दीपेन्द्र रावतले सर्वाधिक ६६ रन जोडे । उनले ८४ बलमा ९ चौका प्रहार गरे । एक समय ६ विकेट गुमाएर ५६ रन मात्र जोडेर खराब स्थितीमा पुगेको कर्णालीका लागि सातौं विकेटका लागि दीपेन्द्र रावतले अर्जुन घर्तीसँग मिलेर १ सय २ रनको साझेदारी गरे । अर्जुन ८४ बलमा ३ चौका र २ छक्काको सहयोगमा ५६ रन जोड्दै आउट भए ।

ओपनर सुनिल धमला १९ तथा दिनेश अधिकारी १७ बलमा ३ चौकाको सहयोगमा १६ रन बनाउँदै आउट भए । निश्चल रावल ११ तथा विपिन रावल १० रनमा आउट भए ।

लुम्बिनीका लागि रमेश कुर्मीले ३, विप्रसन केसी, निर्मल गुरुङ र अजय चौहानले समान २ तथा कप्तान देव खनालले १ विकेट लिए ।

प्रतियोगितामा पराजित लुम्बिनी ७ खेलमा ८ अंकका साथमा तेस्रो स्थानमा छ । ६ खेलमा ६ अंक जोडेको कर्णाली पाँचौ स्थानमा छ । लुम्बिनीको यो लगातार दोस्रो हार हो । भने, कर्णालीको भने लगातार दोस्रो जित हो ।