एजेन्सी – इण्डियन प्रिमियर लिग(आइपिएल) २०२५ मा बलरले बलमा थुक लगाउन पाउने भएका छन् ।

मुम्बईस्थित भारतीय क्रिकेट बोर्ड (बिसिसिआई) को मुख्यालयमा बिहीवार भएको प्रतियोगिताका निर्णयकर्ता सँगको बैठकमा अधिकांश फ्रेन्चाइज कप्तानले परिवर्तनको माग गरेपछि आइपिएलले यस्तो निर्णय गरेको हो ।

सबै कप्तानहरू यो विषयमा सहमत भएका छन् । आइसिसीले अपनाएको थुक प्रतिबन्ध, जुन क्रिकेटका सबै स्तरका सदस्य बोर्डहरूले अनुसरण गरेका थिए । यसले विशेष गरी रिभर्स स्विङलाई सुविधाजनक बनाउन नसकेर बलरहरूलाई घाटा गरिरहेको थियो ।

बललाई चम्किलो बनाउन थुकको प्रयोगमा प्रतिबन्ध पहिलो पटक सन् २०२० मे कोभिड-१९ महामारीको समयमा अस्थायी उपायको रुपमा लागू गरिएको थियो । २०२२ सेप्टेम्बरमा आइसिसीले प्रतिबन्धलाई स्थायी गरेको थियो ।

त्यसपछि बलरहरूलाई बल चम्काउन पसिना को प्रयोग गर्न आइसिसीले अनुमति दिएको थियो । हालै भारतका तीव्र गतिका बलर मोहम्मद सामीले अन्तर्राष्ट्रिय क्रिकेट परिषद् (आइसिसी) लाई बल चम्काउन थुक प्रयोग गर्न पाउने प्रतिबन्ध फुकुवा गर्न आग्रह गरेका थिए ।

च्याम्पियन्स ट्रफीको सेमिफाइनलमा अस्ट्रेलियाविरुद्धको जितपछि सामीले पत्रकारसँग यस्तो भनेका थिए ।