काठमाडौं(हाम्रो खेलकुद) – स्पिनर शाहब आलमको ५ विकेटको सहयोगमा त्रिभुवन आर्मी क्लबविरुद्ध गण्डकी प्रदेशले मध्यम योगफल तयार गरेको छ ।

दाङमा जारी खेलमा खेलमा गण्डकीले १ सय १६ रनको मध्यम योगफल तयार गरेको हो । लमहीस्थित देउखुरी क्रिकेट मैदानमा टस हारेर ब्याटिङको निम्तो पाएको गण्डकी ३०.३ ओभरमा १ सय १६ रनको मध्यम योगफलमा समेटियो ।

गण्डकीका लागि युवा ओपनर अर्जुन कुमालले सर्वाधिक ३३ रन जोडे । उनले ३९ बलमा ४ चौका प्रहार गरे । दिपक डुम्रे ४१ बलमा २ चौकाको सहयोगमा १९ रन जोड्दै आउट भए ।

कमल परियाले १३ बलमा २ छक्काको सहयोगमा १७ रन जोडे । कप्तान विपिन खत्री १३ बलमा १५ रन जोड्दै आउट हुँदा अन्य ब्याटरले दोहोरो अंकमा रन जोड्न सकेनन् ।

आर्मीका लागि शाहब आलमले १० ओभरमा ४२ रन खर्चिएर ५ विकेट लिए । नरेन साउद र कुशल मल्लको नाममा समान २ विकेट रह्यो ।

प्रतियोगिताको ६ खेल खेल्दै १० अंक जोडेको आर्मी दोस्रो स्थानमा छ । पछिल्लो खेलमा आर्मी मधेश प्रदेशसँग पराजित भएको थियो । पछिल्लो ४ खेलमा निरन्तर हार बेहोरेको गण्डकी ६ खेलमा १ खेल जितेर अंक तालिकामा पुछारबाट पहिलो स्थानमा छ ।

प्रतियोगिताको दोस्रो खेलमा गण्डकीले कर्णाली प्रदेशलाई हराएको थियो । १० टोली सहभागी प्रतियोगितामा लिग चरणकाे खेलमा शीर्ष २ टोलीले उपाधीका लागि खेल्नेछ । पहिलो स्थानमा ७ खेलमा अपराजित पुलिस रहेको छ ।