काठमाडौं(हाम्रो खेलकुद) – कर्णाली प्रदेशले प्रधानमन्त्री (पिएम) कप एकदिवसीय राष्ट्रिय प्रतियोगितामा मधेशविरुद्ध ऐतिहासिक जित हासिल गरेको छ ।

कर्णालीले शुक्रवार मधेशविरुद्ध ८१ रनको ऐतिहासिक जित हात पार्यो । पिएम कपको इतिहासमा मधेशमाथि कर्णालीको पहिलो जित हो ।

यो जितसॅंगै कर्णालीले शीर्ष ४ को सम्भावना कायमै राखेको छ । २ सय २१ रनको लक्ष्य पछ्याएको मधेश ३५.२ ओभरमा १ सय ३९ रनमा समेटियो ।

मधेशका लागि रुपेश सिंहले सर्वाधिक ३० रन जोडे । उनले ५३ बलको सामना गर्दै ३ चौका प्रहार गरे । विशाल पटेल २५, हरिशंकर साह १८ तथा ओपनर सैलेन्द्र साह १० रनमा आउट भए ।

कर्णालीका लागि दिनेश अधिकारीले ४, दीपेन्द्र रावतले ३ तथा प्रकास जैसीले २ विकेट लिए ।

त्यसअघि एक्स्ट्रा टेक ओभलमा टस जितेर ब्याटिङ गर्दै ४९.१ ओभरमा २ सय २० रनको बनाएको थियो ।

कर्णालीका लागि निरन्तर दोस्रो खेलमा अर्धशतक बनाएका दीपेन्द्र रावतले सर्वाधिक ६१ रन जोडे । उनले ९२ बलमा ६ चौका प्रहार गरे ।

पाँचौं विकेटका लागि दीपेन्द्रले अर्जुन घर्तीसँग ३६ रनको साझेदारी गरे । अर्जुन २० बलमा २ चौका र १ छक्काको सहयोगमा २६ रनमा आउट भए ।

सातौं विकेटका लागि दिनेश अधिकारीसँग दीपेन्द्रले ६० रनको साझेदारी गरे । दिनेशले ४४ बलमा १ चौका र २ छक्काको साथमा २४ रन जोडे ।

प्रकाश जैशी ३७ बलमा २०, रविन्द्र जंग शाही १४ बलमा १३ रन जोड्दै आउट हुँदा कप्तान दिवान पुन २० बलमा १८ रनमा नट आउट रहे ।

मधेशका लागि रुपेश सिंह, रञ्जित कुमार, कप्तान अनिल साह, कमल गुप्ता र हरिशंकर साहले समान २ विकेट लिए ।

कर्णाली ७ खेलमा ८ अंकका साथ भएको छ । मधेशको ६ खेलमा ४ अंकमा छ ।