काठमाडौं(हाम्रो खेलकुद) – विभागीय टोली नेपाल एपिएफ क्लबले सुदूरपश्चिम प्रदेशलाई प्रधानमन्त्री (पिएम) कप एकदिवसीय राष्ट्रिय प्रतियोगितामा हराएको छ ।

सुदूरपश्चिमविरुद्ध शुक्रवार एपिएफ ३ विकेटले विजयी भयो । १ सय ९२ रनको लक्ष्य एपिएफले ३६.३ ओभरमा ७ विकेट गुमाएर पूरा गर्यो ।

एपिएफका लागि सन्दीप जोराले सर्वाधिक ५१ रन जोडे । उनले ६८ बलमा ५ चौका प्रहार गरे । ओपनर आसिफ शेखले ४६ बलमा ४ चौकाको सहयोगमा ३२ रन जोडे ।

लोकेस बम १९, दिपक बोहोरा १६, कप्तान रोहित पौडेल र भुवन कार्की समान १४ रनमा आउट भए।सुदूरपश्चिमका लागि विकास आग्री, शेर मल्ल र नारायण जोशीले समान २ विकेट लिए ।

त्यसअघि सिद्धार्थ क्रिकेट मैदानमा टस जितेर ब्याटिङ गरेको सुदूरपश्चिम ४८.५ ओभरमा १ सय ९१ रनमा समेटिएको थियो ।

सुदूरपश्चिमका लागि निश्चल खत्रीले ९२ बलमा ८ चौका र १ छक्कासहित ५७ रन बनाए । दोस्रो विकेटका लागि निश्चलले प्रकाश पाण्डेले ९१ रनको साझेदारी गरे । प्रकाशले ७२ बलमा ४ चौकाको सहयोगमा ४२ रन जोडे ।

सुदूरपश्चिम १ विकेट गुमाएर १ सय ९ रनको अवस्थामा विशाल योगफल तयार गर्ने अनुमान गरिएको थियो । तर, मध्यक्रमका ब्याटरहरु नचल्दा सुदूरपश्चिमले ८२ रन जोड्दा बाँकी रहेको ९ विकेट गुमायो ।

किरन ठगुन्ना १२, शेर मल्ल ११ तथा हेमन्त धामी र सुनिल चन्द समान १० रनमा आउट भए । एपिएफका लागि कप्तान रोहित पौडेल र अमरसिंह राउटेलाले समान ३ र भुवन कार्कीले २ विकेट लिए ।

एपिएफ ६ खेलमा ८ अंकका साथ तेस्रो स्थानमा उक्लिएको छ । सुदूरपश्चिम ७ खेलमा ४ अंकमा छ ।