एजेन्सी – महिला ओडिआई विश्वकप २०२५ को फाइनल खेल पञ्जाबको मुल्लानपुरस्थित महाराजा यादविन्द्र सिंह अन्तर्राष्ट्रिय क्रिकेट मैदानमा हुने भएको छ।

ओडिआई महिला विश्वकप सेप्टेम्बर २९ देखि अक्टोबर २६ सम्म भारतमा आयोजना हुनेछ । विशाखापट्टनम, तिरुवनंतपुरम, रायपुर र इन्दौरमा विश्व कपका खेलहरु आयोजना हुनेछ ।

विशाखापट्टनमबाहेक अन्य कुनै पनि स्थानमा अहिलेसम्म महिला अन्तर्राष्ट्रिय प्रतियोगिता आयोजना भएको छैन । इन्दौरले नेहरु रङ्गशालामा महिला विश्वकपका दुई खेलहरू आयोजना गर्ने छ ।

विशाखापट्टनमको एसिए–भिडिसिए रङ्गशालामा पछिल्लो पटक सन् २०१४ मा महिला अन्तर्राष्ट्रिय प्रतियोगिता आयोजना गरिएको थियो । यो रंगशालामा ६ महिला टि ट्वान्टी र ५ महिला ओडिआई खेलहरु भएका छन् ।

आयोजक भारतबाहेक अस्ट्रेलिया, इङ्ग्ल्यान्ड, न्युजिल्यान्ड, दक्षिण अफ्रिका र श्रीलंका यसअघि नै प्रतियोगिताका लागि छनोट भइसकेका छन् । आगामी अप्रिल ९ देखि लाहोरमा हुने महिला विश्वकप छनोटमार्फत अन्तिम दुई स्थानको टुंगो लाग्नेछ ।

यदि पाकिस्तान छनोट भएमा उसले बिसिसीआई र पिसिबीबीचको पारस्परिक सम्झौताअन्तर्गत युएई वा श्रीलंकामा खेल्नेछ । २०१३ पछि भारतले पहिलो पटक महिला विश्वकप आयोजना गर्न लागेको हो ।

२०१६ मा महिला टि ट्वान्टी विश्वकप पनि आयोजना गरेको थियो । २०२५ को संस्करणको ढाँचा २०२२ को जस्तै हुनेछ, जसमा ८ टोलीले कुल ३१ खेल खेल्नेछन् ।

भारतले अहिलेसम्म उपाधि जित्न सकेको छैन । मिताली राज र झुलन गोस्वामीले सन्यास लिएपछि भारतका लागि यो पहिलो ओडिआई विश्वकप हुनेछ ।