एजेन्सी – इण्डियन प्रिमियर लिग (आइपिएल) २०२५ को नवौं खेलमा आज गुजरात टाइटन्स र मुम्बई इण्डियन्सबीच खेल हुँदैछ ।

गुजरातको घरेलु मैदान नरेन्द्र मोदी क्रिकेट स्टेडियममा खेल नेपाली समय अनुसार बेलुका ७ः४५ बजे सुरु हुनेछ । सुरुवाती खेलमा पराजित दुवै टोली आज पहिलो जितको खोजीमा रहेका छन् ।

आफ्नो पहिलो खेलमा गुजरात पञ्जाब किंग्ससँग र मुम्बई चेन्नई सुपर किंग्ससँग चेपकमा पराजित भएको थियो ।

सन् २०२२ मा गुजराज आइपिएलमा सहभागी भएकै वर्ष हार्दिक पाण्ड्याको कप्तानीमा च्याम्पियन भएको थियो। हार्दिक अहिले मुम्बईको कप्तानी गरिरहेका छन् ।

यसपटक प्रतिबन्धका कारण हार्दिकले पहिलो खेल गुमाएका थिए । हार्दिक आज खेल्नेछन् । हार्दिक खेल्न नपाउँदा मुम्बईको कप्तानी सूर्यकुमार यादवले गरेका थिए ।

हार्दिकले पछिल्लो पटक अहमदाबादमा आइपिएल खेल्दा घरेलु समर्थकको आक्रोशको शिकार हुनुपरेको थियो ।

सन् २०२२ देखि गुजरातको महत्वपूर्ण हिस्सा रहँदै आएका राशिद खानले अन्य विभिन्न फ्रेन्चाइजी लिगमा मुम्बईको प्रतिनिधित्व गर्दै आएका छन् । उनले दक्षिण अफ्रिकाको एसए ट्वान्टी, युएईको आईएलटी ट्रवान्टी अमेरिकाको एमएलसीमा मुम्बई फ्रेन्चाइजीका लागि खेल्दै आएका छन् ।

आइपिएल २०२३ र २०२४ राशिदको प्रदर्शन खास राम्रो हुन सकेको छैन । दुवैमा राशिदले प्रति ओभर ८ भन्दा माथि रहेर रन खर्चेका थिए । तर, त्यसअघिका ६ आइपिएल सिजनमा भने उनले ६.७३ को हाराहारीमा मात्र प्रति ओभरमा रन खर्चने गरेका थिए ।

हेड टु हेड

गुजरात र मुम्बईबीच हालसम्म ५ खेल भएको छ । जसमा ३ खेल गुजरातले जित्दा २ मा मुम्बई विजयी भएको छ । गुजरातले आफ्नो घरेलु मैदानमा १७ खेल खेलेको छ । जसमा ९ जित र ८ मा हार बेहोरेको छ ।

मुम्बईले गुजरातसँग नरेन्द्र मोदी क्रिकेट स्टेडियममा ३ खेल खेलकोमा सबैमा हार बेहोरेको छ ।