काठमाडौं(हाम्रो खेलकुद) – अफगानिस्तान यु-१९ टोलीले पहिलो ५० ओभरको अभ्यास खेलमा नेपाललाई ३ सय १ रनको विशाल लक्ष्य दिएको छ ।

मुलपानीमा जारी खेलमा टस जितेर ब्याटिङ रोजेको अफगानिस्तानले निर्धारित ५० ओभरमा ९ विकेट गुमाएर ३ सय रन बनाएको छ ।

अफगानिस्तानका लागि फैसल शिनोजादले ८८ बलमा ९ चौका र ४ छक्काको सहयोगमा ९७ रन बनाए । फैसल र ओपनर खालिद अहमदजईले दोस्रो विकेटका लागि १ सय ५४ रनको साझेदारी गरे । शतकीय साझेदारी बायाँ हाते स्पिनर सन्तोष यादवले तोडेका थिए ।

ओपनर खालिद १ सय ७ बलमा ६ चौकाको सहयोगमा ७६ रनमा बनाए । खालिद र फैसल दुवै सन्तोषको शिकार बने । बर्कत इब्राहिमजीले २६ बलमा २ चौका र २ छक्काको सहयोगमा ३५ रन जोडे ।

अजिज मिअया खिल २० बलमा २१, ओपनर उजेरउल्लाह नियाजी २२ बलमा २४ रनमा आउट हुँदा नोरिस्तानि उमरजाईं र जियालुल्लाह शाहिदीले रनको खाता नै खोल्न सकेनन् ।

नजिफुल्लाह अमिरि १० रनमा आउट हुँदा अब्दुल अजिज १५ रनमा नट आउट रहे । अफगानिस्तानले २ सय ३ रन जोड्दा १ विकेट मात्र गुमाएर विशाल योगफल बनाउँने संकेत गरेको थियो ।

तर, खेलमा नेपाली बलरहरुले उत्कृष्ट पुनरागमन गरेपछि ९७ रन जोड्दा ८ विकेट गुमाउन पुग्यो ।

नेपाली का लागि सन्तोष यादवले १० ओभरमा ६४ रन खर्चिएर ३ विकेट लिए । अभिषेक तिवारीले ८ ओभरमा ६१ रन खर्चिएर २ विकेट लिए । दयानन्द मण्डल तथा विपिन शर्माले समान १ विकेट आफ्नो नाममा गरे ।

नेपाल र अफगानिस्तान यु१९ पुरुष विश्वकपको एसिया छनोटको तयारीमा छन् । छनोट अघि दुवै टोलीले ३ खेलको ५० ओभरको अभ्यास सिरिज खेल्न लागेका हुन् । एसिया छनोट आगामी साता नेपालमा सुरु हुँदैछ ।