काठमाडौं(हाम्रो खेलकुद) – अफगानिस्तान यु-१९ टोलीले पहिलो ५० ओभरको अभ्यास खेलमा नेपाललाई पराजित गरेको छ ।

नेपाल यु-१९ ले बिहीवार भएको खेलमा १ सय ३० रनको हार बेहोरेको हो । अफगानिस्तानले ३ अभ्यास खेलको सिरिजमा १-० को अग्रता बनाएको छ ।

३ सय १ रनको लक्ष्य पछ्याएको नेपाल ४६.२ ओभरमा १ सय ७० रन बनाउँदै अल आउट भयो ।

नेपालका लागि ओपनर निरज कुमार यादवले ६१ बलमा ४ चौका र २ छक्काको सहयोगमा ५३ रनको अर्धशतकीय इनिङ खेले । सन्तोष यादव ३९ बलमा १ चौकाको सहयोगमा २४ रन बनाए ।

कप्तान नरेन भट्ट १३, सिब्रिन श्रेष्ठ ११, अमर मिश्र १, रोशन विश्वकर्मा ४ तथा ओपनर साहिल पटेल २ रनमा आउट भए । असोक धामी २४ र अभिषेक तिवारी १७ रनमा जोडे ।

नेपाली इनिङ सस्तैमा समेट्न अफगानिस्तानका वाहिदुल्लाह जाद्रान, जियाउल्लाह शाहीदी र मेहबुब खानले समान २ तथा अब्दुल अजिज, नोरिस्तानी उमजाईं र नजिफुल्लाह अमिरिले समान १ विकेट लिए ।

त्यसअघि माथिल्लो मुलपानी क्रिकेट मैदानमा टस जितेर ब्याटिङ रोजेको अफगानिस्तानले निर्धारित ५० ओभरमा ९ विकेट गुमाएर ३ सय रन बनाएको थियो ।

अफगानिस्तानका लागि फैसल शिनोजादले ८८ बलमा ९ चौका र ४ छक्काको सहयोगमा ९७ रन बनाएका थिए । फैसल र ओपनर खालिद अहमदजईले दोस्रो विकेटका लागि १ सय ५४ रनको साझेदारी गरेका थिए । उनीहरुको शतकीय साझेदारी नेपालका बायाँ हाते स्पिनर सन्तोष यादवले तोडेका थिए ।

ओपनर खालिद १ सय ७ बलमा ६ चौकाको सहयोगमा ७६ रन बनाएका थिए । खालिद र फैसल दुवै सन्तोषको शिकार बनेका थिए । बर्कत इब्राहिमजीले २६ बलमा २ चौका र २ छक्काको सहयोगमा ३५ रन जोडेका थिए ।

अजिज मिअया खिल २० बलमा २१, ओपनर उजेरउल्लाह नियाजी २२ बलमा २४ रनमा आउट हुँदा नोरिस्तानि उमरजाईं र जियाउल्लाह शाहिदीले रनको खाता नै खोल्न सकेनन् ।

नजिफुल्लाह अमिरि १० रनमा आउट हुँदा अब्दुल अजिज १५ रनमा नट आउट रहे । अफगानिस्तानले २ सय ३ रन जोड्दा १ विकेट मात्र गुमाएर विशाल योगफल बनाउँने संकेत गरेको थियो ।

तर, खेलमा नेपाली बलरहरुले उत्कृष्ट पुनरागमन गरेपछि ९७ रन जोड्दा ८ विकेट गुमाउन पुग्यो ।

नेपालीका सन्तोष यादवले १० ओभरमा ६४ रन खर्चिएर ३ विकेट लिए । अभिषेक तिवारीले ८ ओभरमा ६१ रन खर्चिएर २ विकेट लिए । दयानन्द मण्डल तथा विपिन शर्माले समान १ विकेट आफ्नो नाममा गरे ।

नेपाल र अफगानिस्तान यु-१९ पुरुष विश्वकपको एसिया छनोटको तयारीमा छन् । छनोट अघि दुवै टोलीले ३ खेलको ५० ओभरको अभ्यास सिरिज खेलिरहेका हुन् ।

दोस्रो अभ्यास खेल आइतवार हुनेछ । एसिया छनोट अर्को साता नेपालमा सुरु हुँदैछ । छनोटमा नेपाल र अफगानिस्तानसहित हङकङ, युएई र ओमा टोलीको सहभागिता रहनेछ ।