काठमाडौँ (हाम्रो खेलकुद) – रोयल केसिटिसी इन्डोर क्रिकेटमा जारी कर्पोरेट क्ल्यास २०१७ अन्तर्गत सोमबार भएको खेलमा नेपाल लाइफ इन्स्योरेन्स कम्पनिले रुस्लानलाइ सुपर ओभरमा पराजित गरेको छ।
टस जितेर पहिलो रुस्लानले एन.एल.आई.सीलाइ ब्याटिङको निम्तो दिएको थियो। कप्तान गोकुल झाको १९ रनको मद्दतले एन.एल.आई.सीले १२ ओभरमा ५ विकेट गुमाउदै ७९ रन जोड्यो। उसका लागि किशोर कुमार तकछे (१४), अजय लाल दास (१३) र रोशन दवाडीले (१०)रनको योगादन दिए रुस्लानका रुपेश खड्काले ३ विकेट लिदै एक रनआउट गरेका थिए।
८० रनको लक्ष्य पछ्याएको रुस्लानले राम्रो सुरुवात गरेको थियो। उसका लागि ओपनर सुधिर दत्तले २२ र समिर कर्णले १३ रन जोडे मध्यक्रमले राम्रो प्रदर्शन नगरेपछि रुस्लानले नियमित विकेट गुमाएको थियो। तर, जितको लागि अन्तिम रन लिने सुरमा अन्तिम विकेट गुमाएपछि खेल सुपर ओभरतर्फ धकेलियो।
सुपर ओभरमा एन.एल.आई.सीका अजय लाल दासले २ विकेट लिएर ४ रन खर्चेपछि रुस्लान खेलमा पछि पर्यो। पहिलो बलमा लेग बाइमा रन पाएपछि किशोर कुमार तकछेले चौका प्रहार गर्दै एन.एल.आई.सीलाइ लगातार दोश्रो जित दिलाएका थिए।
विजयी टोलीका कप्तान गोकुल झा म्यान अफ द म्याच भए।
