काठमाडौं (हाम्रो खेलकुद) – यु-१९ विश्वकपका लागि जारी ३ खेलको अभ्यास सिरिजको दोस्रो खेलमा आज अफगानिस्तानले नेपाललाई नाटकीय शैलीमा १ रनले हराएको छ ।

यो सँगै तीन खेलको अभ्यास सिरिज अफगानिस्तानले एक खेल अगाडि २-० ले जितेको छ । नेपालको हारको प्रमुख कारण खराब ब्याटिङ नै बन्यो । साहिल पटेल बाहेक अन्य ब्याटरको प्रदर्शन फितलो रहँदा नेपालले जित निकाल्न सकेन ।

मुलपानी मैदानमा जितको लागि १ सय ६९ रनको लक्ष्य पछाएको नेपाल ४९.३ ओभरमा १ सय ६७ रनमा अल आउट हुँदा १ रनको पिडादायी हार बेहोर्न बाध्य भयो ।

ओपनर निरज कुमार यादव १५ रन र कप्तान नरेन भट्ट पनि मात्र १३ रन जोडेर आउट भए । ओपनर साहिल पटेललाई अन्य खेलाडीले साथ दिन सकेनन् । तर उनले सुझबुझपुर्ण ब्याटिङ गरे । क्रिजमा टिकिरहे ।

सिब्रिन श्रेष्ठ २ रन, दिलसाद अलि ८ रन, अभिषेक तिवारी २४ रन र रोशन विश्वकर्मा ९ रनमा आउट भए। ओपनर साहिल ४२ औं ओभरमा आउट भए । उनले १ सय १९ बल खेल्दै ६ चौका सहित ६८ रनको महत्वपूर्ण योगदान दिए। ७ विकेटको नोक्सानीमा नेपालले १ सय ४३ रन बनाएको थियो ।

४२.२ ओभरमा साहिल आउट हुँदा नेपाललाई जितको लागि २६ रन आवश्यकता थियो । बाँकी ४६ बल र ३ विकेटको साथमा नेपालले २६ रन बनाउन सकेन । सन्तोष यादव ४ रनमा र अप्राजित पौडेल खाता नखोली आउट भए ।

दबाबमा आएको नेपाललाई अन्तिम ६ बलमा जितेका लागि ११ रन आवश्यक थियो । त्यो ओभर नाटकीय बन्यो । दर्श सोनारले पहिलो बलमा चौका प्रहार गरे । दोस्रो बल डट भयो । तेस्रो बलमा फेरि सोनारले स्ट्रेटमा चौका प्रहार गरे ।

चौथो बलमा दर्श बोल्ड भए। तर अम्पायरले यसलाई नो बल दिइसकेका थिए । अफगानी खेलाडी जित सोचेर खुसी मनाउँदा दर्श निराश भएर क्रिजबाहिर निस्के । तर विकेटकिपरले बल समाएर स्टम्प निकालेपछि अम्पायरले केहीबेर छलफलपछि रनआउट दिए । फ्रि हिट अवसरका साथै ३ बलमा २ रन चाहिने स्थिति हुनुपर्ने नेपाल रनआउटसँगै अलआउट भयो ।

बलिङमा वाहिदुल्लाह जद्रान, जाइतुल्लाह शाहिन, हाफिज जद्रानले समान विकेट लिए ।

त्यसअघि टस जितेर ब्याटिङ गरेको अफगानिस्तानले ५० ओभरमा अल आउट हुँदै १ सय ६८ रन मात्र बनायो । आज अफगानिस्तानका खेलाडीले ब्याटिङमा संघर्ष गरे।

अफगानिस्तान विरूद्ध नेपालले राम्रो सुरुवात गर्यो। ३८ रन जोड्दा उसले ४ विकेट गुमाइसकेको थियो। ओपनर खालिद अमदाजी १० रनमा सन्तोष यादवको बलमा आउट भए। यसपछि फैजल सिनोजादा बिना कुनै रन, उजैरुला नियाजाई १९ रनमा र बर्कत इब्राहिमजाई रनको खाता नखोली आउट भए।

कप्तान मेहबुब खान मात्र क्रिजमा टिके। अन्यले उनलाई साथ दिन समेत सकेनन्। रोउल्लाह अरबले २७ रन बनाए।

मेहबुबले अर्धशतकीय पारी खेले। उनले १ सय १४ बल खेल्दै १ चौका प्रहार गर्दै ५८ रन जोडे। उनी नै अफगानिस्तानको लागि सर्वाधिक रन बनाउने खेलाडी बने। उनलाई अभिषेक तिवारीले आउट गरे।

बलिङमा सन्तोष यादवले १० ओभरमा १ मेडन सहित २३ रन दिएर ३ विकेट लिए। यस्तै सिब्रिन श्रेष्ठले २ विकेट लिए।

यसअघि विहीबार भएको पहिलो खेलमा नेपाल अफगानिस्तानसँग १ सय ३० रनको फराकिलो अन्तरमा पराजित भएको थियो ।

नेपाल र अफगानिस्तान दुवै राष्ट्र यु-१९ पुरुष विश्वकपको एसिया छनोटको तयारीमा छन् । एसिया छनोट अर्को साता नेपालमा नै हुनेछ । छनोटमा नेपाल र अफगानिस्तानसहित हङकङ, युएई र ओमानले प्रतिस्पर्धा गर्नेछन्।

नेपालले सन् २००० मा पहिलो पटक यु१९ विश्व कप खेलेको थियो। २००० देखि २०२४ सम्म नेपालले ८ पटक विश्व कप खेलिसकेको छ। अब यो पटक नेपाल नवौं पटक विश्व कप खेल्न छनोटको तयारीमा रहेको छ।