विराटनगर (हाम्रो खेलकुद)- विराटनगरको वाइआरसिसी क्रिकेट क्लबले चौथो मिल्स कप इण्डो–नेपाल टि ट्वान्टी क्रिकेट प्रतियोगिताको उपाधि जितेको छ ।

विराटनगर जुट मिल खेल मैदानमा शनिवार भएको फाइनलमा भारतको पटनाको हाइपर क्रिकेट क्लबलाई ८ विकेटले पराजित गर्दै वाईआरसिसीले उपाधि रक्षा गरेको हो ।

टस जितेर पहिले ब्याटिङ गरेको पटनाको टिम १६.३ ओभरमा अलआउट हुँदै १ सय १ रनमा समेटियो । पटनाका सुदर्शन कुमारले ३२ बलमा सर्वाधिक ४६ रन बनाए ।

त्यस्तै पुरुषोत्तम कुमारले ६ बलमा १६ र नन्द किशोरले १६ बलमा ११ रन जोडे । अन्य ब्याटर दोहोरो अंकमा रन जोड्न सकेनन् ।

वाइआरसिसीका हेमन्त धामी र राम नरेश गिरीले उत्कृष्ट समान ३ विकेट लिए । हेमन्तले ४ ओभरमा ३२ रन र रामले ३.३ ओभरमा १३ रन दिएर खर्चिए ।

१ सय २ रनको सामान्य लक्ष्य पछ्याएको वाइआरसिसीले मात्र ८ ओभरमा २ विकेट गुमाएर विजय हासिल गर्यो ।

टोलीका इमरान शेखले निर्णायक भूमिका निभाए । उनले ३२ बलमा विस्फोटक ब्याटिङ गर्दै ६ छक्का र ७ चौकासहित नटआउट ७२ रन बनाए ।

शुभ कंसकारले ७ बलमा १२ र लोकेस बलले ८ बलमा १६ रनको जोडे । पटनाका रेहान दास गुप्ता र नन्द किशोरले समान १ विकेट लिए ।

उत्कृष्ट प्रदर्शन गरेका वाइआरसिसीका इमरान फाइनलको ’प्लेयर अफ द म्याच’ घोषित भए र ३ हजार रुपैयाँ प्राप्त गरे ।

वाइआरसिसीका नरेश गिरी सर्वोत्कृष्ट खेलाडी घोषित भए र २५ हजार रुपैयाँ पाए । होराइजनका दिपेश कडेल उत्कृष्ट बलर र पटनाका कुमार श्रेय उत्कृष्ट ब्याटर घोषित भए । उनीहरुले समान १५ हजार रुपैयाँ पाए ।

विजेता वाइआरसिसीले ट्रफीसहित २ लाख १ हजार रुपैयाँ र पटनाले १ लाख १ हजार रुपैयाँ प्राप्त गर्यो ।
विजता टोलीलसई क्रिकेट संघ नेपालका उपाध्यक्ष रोशन सिंहले पुरस्कार वितरण गरे ।

मिल्स क्रिकेट क्लब एण्ड एकेडेमीको आयोजना तथा प्रदेश खेलकुद विकास बोर्ड कोशी प्रदेशको संयोजनमा भएको प्रतियोगितामा नेपाल र भारतका समसन ६ गरी १२ टोलीको सहभागिता थियो।