काठमाडौं (हाम्रो खेलकुद)- अफगानिस्तानले आइसिसी यु-१९ विश्वकप एसिया छनोटमा आज सानदार सुरुवात गरेको छ।

अफगानिस्तानले ओमानलाई ८ विकेटको फराकिलो अन्तरमा हराउँदै विजयी सुरुवात गर्यो। मुलपानीको‌ माथिल्लो मैदानमा ओमानले टस जितेर पहिले ब्याटिङ रोज्यो।

निराशाजनक ब्याटिङ गर्दा ओमान ३६.२ओभर मा सम्पूर्ण विकेट गुमाउँदै मात्र ९० रनमा समेटियो।
ओमानका प्रथिश हेमा रमेशले सबैभन्दा बढी १७ रन बनाए। जित ब्रदेश शाहले १५ र पुलाडिथ रलालागेले १४ रन जोडे।

अफगानिस्तानको धारिलो बलिङमा यी ३ बाहेक अन्यले दोहोरो रन बनाउन सकेनन्। ८ खेलाडीले दोहोरो अंकको रन छुन सकेनन्। ओमानले ब्याटबाट मात्र ७४ रन जोड्यो। अफगानिस्तानले १६ रन एक्स्ट्रा दिएको थियो।

अफगानिस्तानका खातिर खान, जियातुल्लाह साहिन, मेहबुब खान र हाफीजुल्लाह जद्रानले समान २ विकेट लिए। सबैभन्दा किफायती बलिङ हाफिजुल्लाहले गरे। १० ओभर बलिङ गर्दै ४ मेडन सहित मात्र ११ रन खर्चे।

जवाफमा ९१ रनको सहज विजय लक्ष्य अफगानिस्तानले ११.१ओभरमा २ विकेटको नोक्सानीमा पूरा गर्यो।

उसको लागि खालका द अहमदाजीले ३० बलमा ७ चौका सहित ४० रन बनाए। उजेरुल्लाह नियाजायी खानले २७ रन जोडे।

त्यस्तै नफिजुल्लाह अमिरी ११ र फैजल खा ९ रनमा अविजित रहे। यसरी ओमानलाई निरिह बनाउँदै अफगानिस्तानले ८ विकेटको जितमा सानदार सुरुवात गरेको छ।

भोलि ओमानले नेपालसँग र अफगानिस्तानले हङकङसँग खेल्नेछ।