एजेन्सी – राजस्थान रोयल्सले इण्डियन प्रिमियर लिग (आइपिएल) मा दिल्ली क्यापिटल्सलाई सुपर ओभरमा गएको छ।

जितको लागि १ सय ८९ रनको लक्ष्य पछ्याएको राजस्थानले ४ विकेटको‌ नोक्सानीमा १ सय ८८ रन बनायो ।

अन्तिम ओभरमा जितको लागि राजस्थानलाई ९ रनको‌ आवश्यकता थियो। तर टोलीले ८ रन मात्र बनाउन सक्यो। मिचेल स्टार्कले अन्तिम ओभर बलिङ गरेका थिए।

टोलीका लागि ओपनर यशस्वी जैसवाल र नितिश राणाले अर्धशतकीय इनिङ खेले। यशस्वी र कप्तान संजु सामसनले पहिलो विकेटका लागि ६१ रनको साझेदारी गरे । संजु ३१ रन बनाएर रिटायर्ड हर्ट भए ।

यशस्वीले ३७ बलमा ३ चौका र ४ छक्कासहित ५१ रन बनाए । रियान पराग ८ रनमा आउट भए। नितिशले २८ बलमा ६ चौका र २ छक्काका साथ ५१ रननै बनाए ।

ध्रुव जुरेल २६ र सिमरन हिमेयर १५ रनमा नटआउट रहे।
दिल्लीका‌ मिचेल स्टार्कले, अक्षर पटेल र कुलदीप यादवले समान १ विकेट लिए।

अरुण जैटली स्टेडियममा त्यसअघि राजस्थानले टस जितेर दिल्लीलाई ब्याटिङको लागि मैदानमा उतार्यो। दिल्लीले २० ओभरमा ५ विकेट गुमाएर १ सय ८८ रन जोड्यो।

अभिषेक पोरेलले ३७ बलमा ५ चौका र १ छक्का सहित ४९ रन जोडे। उनी अर्धशतकबाट मात्र १ रनले चुके। केएल राहुलले ३८ रन बनाउँदा कप्तान अक्षर पटेलले ३४ र ट्रिस्टान स्टब्स अविजित ३४ रनमा रहे।

बलिङमा जोफ्रा आर्चरले ४ ओभर बलिङ गर्दै ३२ रन खर्चेर २ विकेट लिए।