काठमाडौं (हाम्रो खेलकुद)- कर्पोरेट महिलाहरुको लागि आयोजना गरिने क्रिकेट प्रतियोगिता ‘शी स्ट्राइक्स’ को तेस्रो संस्करण यसै साता हुने भएको छ।

९ वटा कर्पोरेट टोलीहरुको सहभागितामा बैशाख १२ र १३ गतेका सिन्धुली बिपि राजमार्गमा पर्ने मुलकोटस्थित क्वालिटी बिच रिसोर्टमा क्रिकेट हुने सोमवार आयोजक एन इभेन्ट्सले पत्रकार सम्मेलनमार्फत जानकारी दिएको छ।

सहभागी टोलीलाई ३ समूहमा विभाजन गरिएको छ। जसको समूह ‘ए’ मा सिटिजन लाइफ इन्स्योरेन्स, सनिमा रिलायन्स लाइफ इन्स्योरेन्स र सिटिजन्स बैंक छन्।

समूह ‘बी’ मा एनसेल, सुर्या नेपाल र क्लाउडफ्याक्ट्री तथा समूह ‘सी’ मा एजु-ब्रिज, राष्ट्रिय वाणिज्य बैंक र सूर्यज्योति लाइफ इन्स्योरेन्सले प्रतिस्पर्धा गर्नेछन्।

‘शी स्ट्राइक्स’ कर्पोरेट महिलाहरूले आफ्नो दैनिकीबाट बाहिर निस्किएर आपसी सम्बन्ध बनाउने, प्रतिस्पर्धा गर्ने र रमाइलो गर्ने एउटा उत्सवको रुपमा आयोजना गर्न लागिएको बताइएको छ।

दुई दिने प्रतियोगिता समूह चरणबाट सुरु हुनेछ।त्यसपछि टिमहरू ‘कन्टेन्डर स्टेज’ मा पुग्नेछन्। समूह चरणको नतिजाका आधारमा ३ वटा पूलमा विभाजन गरिनेछ ।

हरेक समूको शीर्ष स्थानका टोली ‘एलिट पूल’, दोस्रो स्थानका ‘च्यालेन्जर पूल’ र तेस्रो स्थानका लागि ‘प्लेट पूल’ मा रहनेछन्।

‘एलिट पूल’ दुई टोली ‘क्वालिफायर १’ मा प्रतिस्पर्धा गर्नेछन् । त्यसको विजेता सिधै फाइनल प्रवेश गर्नेछ। पराजित टोलीसँग अझै उपाधिको अवसर बाँकी रहनेछ।‌

त्यो टोलीले ‘क्वालिफायर २’ मा ‘च्यालेन्जर पूल’ को विजेतासँग प्रतिस्पर्धा गर्नेछन्। त्यो खेलको विजेता फाइनलमा पुग्नेछ । ‘प्लेट पूल’ का टोलीले ‘प्लेट च्याम्पियनसिप’ को लागि प्रतिस्पर्धा गर्नेछन् ।

सोही अवसरमा ट्रफीको अनावरणका साथै सहभागी टोलीका कप्तानलाई जर्सी हस्तान्तरण गरियो।