काठमाडौं (हाम्रो खेलकुद) – आइसिसी महिला टी-ट्वान्टी वल्ड कप एसिया क्वालिफायरमा नेपालले जितको लागि हङकङलाई मात्र ३० रनको चुनौति दिएको छ ।

बैंककस्थित एसियन इन्स्टिच्युट अफ टेक्नोलोजी मैदानमा हिजो रातिको वर्षाले मैदान भिजेको कारण खेल निकै ढिला गरी सुरू भयो। खेललाई ५ ओभरमा घटाएर सुरूवात गरियो। जहाँ टस जितेर हङकङले पहिले नेपाललाई ब्याटिङको लागि उतार्यो।

नेपालले ५ ओभरमा ३ विकेट गुमाउँदै मात्र २९ रन जोड्न सक्यो। ओपनर कविता कुँवर मात्र २ रनना र सम्झना खड्का १० रन जोडेर आउट भए। १३ रन बनाउँदा नेपालले दुई ओपनरलाई गुमायो।

यसपछि कप्तान इन्दु बर्मा र पुजा महतो क्रिजमा थिए। ठुलो सट खेल्ने क्रममा पुजा इक्रा सहरको बलमा नताशा माइल्सको बलमा मात्र ३ रन जोडेर क्याच आउट हुन पुगिन्। ब्याटिङमा संघर्ष गरेको नेपालले ४ ओभरको समाप्तीमा ३ विकेटको नोक्सानीमा मात्र २३ रन बनायो। इन्दु अविजित ९ रनमा र रूबिना क्षेत्री अविजित ४ रनमा क्रिजमा रहे।

सुपर थ्री प्रवेशको लागि जित नेपाललाई जरूरी छ। तर नेपालले ब्याटिङमा फितलो प्रदर्शन गर्यो। ५ ओभरको खेलमा मात्र सम्झनाले एक चौका प्रहार गरिन्।

बलिङमा केरी चान, एलिसन सिउ र इक्रा सहरले १-१ विकेट लिए।

यसअघिको नेपाल र हङकङबीचको पहिलो खेल वेट आउट फिल्डको कारण रद्द भएको थियो। नेपालले दोस्रो खेलमा भने बहराइनलाई ९ विकेटको फराकिलो अन्तरमा हराएको थियो।

जक्वालिफायरमा नेपाल सहित आयोजक थाइल्यान्ड, भुटान, कुवेत, कतार, मलेसिया, हङकङ, बहराइन र युएईबीच प्रतिस्पर्धा जारी छ।

नेपाल बहराइन र हङकङसँगै समूह ‘सी’ मा रहेको छ । समूह ‘ए’ मा भुटान, कुवेत र थाइल्यान्ड रहँदा समूह ‘बी’ मा मलेसिया, कतार र युएई रहेका छन् ।

समुह चरण डबल राउन्ड रोबिनको आधारमा हुनेछ। सबै टोलीले आनो समुहमा रहेको टिमसँग दुई पटक खेल्नेछन्।‌ समूहको शीर्ष टोलीले सुपर थ्रीमा स्थान बनाउँने छ । सुपर थ्रीबाट शीर्ष दुईमा रहने टोली ग्लोबल छनोटमा स्थान बनाउन सफल हुनेछ ।