काठमाडौं (हाम्रो खेलकुद)- आइसिसी महिला टि-ट्वान्टी वल्ड कप एसिया क्वालिफायरको सुपर थ्रीमा युएईले नेपाललाई जितको लागि १ सय १५ रनको प्रतिस्पर्धात्मक चुनौती दिएको छ।

टेर्डथाई क्रिकेट मैदानमा टस जितेर नेपालले पहिले फिल्डिङ गर्ने निर्णय गरेको थियो । युएईले २० ओभरमा ७ विकेट गुमाउँदै १ सय १४ रनको योगफल खडा गर्यो।

ओपनरद्वय इशा ओजा र थ्रीता सतिशले पहिलो विकेटको लागि ४५ रनको साझेदारी गरे। थ्रीता २१ रनमा राजमति ऐरीको बलमा आउट भइन्। पहिलो विकेट झार्न नेपालले १० औं ओभर कुर्नुपर्यो।

इशाले २ चौका र १ छक्का सहित ३९ रन बनाइन्। यस्तै हिना होटचान्डीले २० र लाभान्या केनीले १२ रन बनाए।

बलिङमा मनिषा उपाध्यायले ४ ओभर बलिङ गर्दै २० रन खर्चेर ४ विकेट झारिन्। कविता कुँवरले २ र राजमतिले१ विकेट लिइन्।

सुपर थ्रीको यो प्रतिस्पर्धामा जित निकाले ग्लोबल छनोटमा नेपालले स्थान सुरक्षित गर्नेछ। हारले नेपालको छनोट यात्रामा पूर्ण विराम लाग्नेछ।

हिजो भएको खेलमा युएईलाई ५४ रनले हराउँदै आयोजक थाईल्याण्ड भने ग्लोबल छनोटमा स्थान सुरक्षित गर्न सफल भैसकेको छ।

त्यसैले आज नेपाललाई जित जरुरी छ। नेपाल, थाइल्याण्ड र युएई तीन समुहको विजेता बन्दै सुपर थ्रीमा पुगेका हुन्।