नेपालले टस जित्यो

काठमाडौं (हाम्रो खेलकुद) – आइसीसी महिला टि२० विश्वकप एसिया क्षेत्र छनोट अन्तर्गत सुपर थ्री को अन्तिम खेलमा नेपालले थाइल्याण्डविरुद्ध टस जितेर पहिलो फिल्डीङ गर्ने निर्णय लिएको छ ।

प्रतियोगिताको उपाधि जित्न नेपालले यो खेल जित्नुपर्ने हुन्छ । नेपाल र थाइल्याण्ड दुवै सुपर थ्री को शीर्ष दुईमा रहेर विश्वकपको ग्लोबल छनोटमा भने अघि बढिसकेका छन् । एसिया छनोट अन्तर्गत ‘सुपर थ्री’ को अन्तिम खेल हो । खेल नेपाली समयअनुसार बिहान ८:४५ बजे सुरु हुनेछ ।

तीन समूहका शीर्ष टोली सुपर थ्रीमा पुगेका थिए। नेपाल र थाइल्याण्ड दुवै युएईलाई हराएर ग्लोबल छनोटमा पुगेका हुन् । नेपालले सोमबार युएईलाई ५ विकेटले हराएर ऐतिहासिक सफलता प्राप्त गरेको थियो । थाइल्याण्डको ८ अंक, नेपालको ७ अंक र यूएईको ६ अंक रहेको छ ।

ग्लोबल छनोटमा पुग्ने पहिलो लक्ष्य पूरा गरेको नेपाल सामू आज एसिया च्याम्पियन बन्ने अवसर छ । टोली उच्च मनोबलका साथ मैदानमा उत्रिने कप्तान इन्दु वर्माले बताएकी छिन् ।

नेपालले समूह चरणमा बहराइनलाई दुवै खेलमा हराएको थियो । हङकङसँग पराजित भएको थियो । हङकङको नेपालसँग १ र बहराइनसँग दुवै खेल वर्षाले प्रभावित हुँदा नेपाल बढी जितका आधारमा समूहको शीर्ष टोली बन्दै सुपर थ्रीमा पुगेको थियो ।