एजेन्सी – इण्डियन प्रिमियर लिग (आइपिएल) मा कप्तान ऋषभ पन्तको शतकमा लखनउ सुपर जायन्ट्सले रोयल च्यालेन्जर्स बेंगलुरु (आरसिबी) लाई २ सय २८ रनको विशाल लक्ष्य दिएको छ ।

घरेलु मैदान ऐकना क्रिकेट स्टेडियममा टस जितेर आरसिबीले फिल्डिङ रोजेको थियो। पहिले ब्याटिङको निम्तो पाएको लखनउले निर्धारित २० ओभरमा ३ विकेट गुमाएर २ सय २७ रन बनाएको छ।

कप्तान पन्तले शतकीय इनिङ खेले । पन्तले ६१ बलमा ११ चौका र ८ छक्काको सहयोगमा नट आउट १ सय १८ रन बनाए ।

पन्तले दोस्रो विकेटका लागि ओपनर मिचेल मार्शसँग १ सय ५२ रनको साझेदारी गरे । मार्शले ३७ बलमा ४ चौका र ५ छक्कासहित ६७ रनको अर्धशतकीय इनिङ खेले ।

अर्का ओपनर म्याथ्यु ब्रेट्ज्के १२ बलमा १४ रन बमाए । निकोलस पुरन १० बलमा १ चौकाको सहयोगमा १३ रनमा आउट भए । आरसिबीका लागि रोमारियो शेफर्ड, नुवान तुषारा र भुवनेश्वर कुमारले समान १ विकेट लिए ।

लखनउ प्लेअफबाट बाहिरिसकेको छ । प्लेअफमा पुगिसकेको आरसिबी लखनउलाई हराउँदै पहिलो क्वालिफायर पुग्ने प्रयासमा हुनेछ ।

आरसिबीले यो खेल हारेमा गुजरात टाइटन्सले पहिलो क्वालिफायर पुग्नेछ । त्यो अवस्थामा आरसिबीले मुम्इबई इण्डियन्ससँग इलिमिनेटर खेल्नु पर्नेछ।‌

सोमवार मुम्बईलाई पराजित गरेको पञ्जाब किङ्स पहिलो क्वालिफायरमा पुगिसकेको छ।