चितवन (हाम्रो खेलकुद)- चितवन यु-१९ च्याम्पियनसिप क्रिकेट प्रतियोगिता हुने भएको छ ।

चितवन जिल्ला क्रिकेट संघको आयोजना र सेन्ट्रल कलेज अफ भोकेशनल ट्रेनिङ सेन्टर प्रालिको मुख्य प्रायोजनमा प्रतियोगिता हुन लागेको हो ।

प्रतियोगिता जेठ २१ गते गौतमबुद्ध अन्तर्राष्ट्रिय क्रिकेट रंगशालाको नमुना मैदानमा सुरु हुनेछ ।

प्रतियोगिताको मुख्य प्रायोजनका लागि आज नै क्रिकेट संघ र सेन्ट्रल कलेजबीच प्रायोजन सम्झौतामा हस्ताक्षर भएको छ । संघका अध्यक्ष सुदिप पिया र सेन्ट्रल कलेज अध्यक्ष यज्ञ विलास (वाइवी) पौडेलले सम्झौतापत्रमा हस्ताक्षर गरे ।

पौडेलले चितवन र आसपासका जिल्लामा हुने खेलकुद गतिविधिमा सेन्ट्रल कलेजले सधै सहकार्य गर्दै आइरहेको स्मरण गर्दै युवा खेलाडीको प्रतिभा उजागर गर्ने प्रतियोगितालाई पनि साथ दिने बताए । उनले क्रिकेट संघसँग सदैव सहकार्य गर्दै अघि बढ्ने विश्वास दिलाए ।

चितवन क्रिकेट संघका अध्यक्ष पियाले सेन्ट्रल कलेजको साथले यो प्रतियोगिता गर्न सम्भव भएको भन्दै सहकार्यका लागि धन्यवाद दिए ।

प्रतियोगितामा सहभागिताको लागि खेलाडी दर्ता खुला गरिएको छ । जेठ १७ गते भित्रमा नाम दर्ता गराउने खेलाडीलाई विभिन्न टिममा विभाजन गरिनेछ । प्रतियोगिता टि ट्वान्टी फर्म्याटमा हुने आयोजकले जनाएको छ ।

विजेता टोलीले ट्रफी, उत्कृष्ट खेलाडीले क्रिकेट किट ब्याग, उत्कृष्ट ब्याटरले ब्याट र उत्कृष्ट बलरले बलिङ जुत्ता प्राप्त गर्ने बताइएको छ।