एजेन्सी – घरेलु टोली इङ्ग्ल्याण्डले पाहुना टोली वेस्ट इण्डिजलाई पहिलो ओडिआई खेलमा पराजित गरेको छ ।

बिहीबार राती भएको खेलमा वेस्ट इण्डिजमाथि घरेलु टोलीले २ सय ३८ रनको फराकिलो जित हात पारेको हो । जितसँगै घरेलु टोलीले ३ खेलको ओडिआई सिरिजमा १-० को अग्रता बनाएको छ । ४ सय १ रनको लक्ष्य पछ्याएको पाहुना टोली वेस्ट इण्डिज २६.२ ओभरमा १ सय ६२ रनमा समेटियो ।

वेस्ट इण्डिजका लागि जयडेन सेल्सले नट आउट रहँदै १४ बलमा सर्वाधिक २९ रन जोडे । कप्तान शाइ होप २५, केसी कार्टी २२, गुणकेश मोटी १८, अमिर जान्जो १४ तथा अल्जारी जोसेफ १२ रनमा आउट भए ।

घरेलु टोलीका लागि जेमी ओभरटर्न र सकिब मोहम्मदले समान ३, आदिल राशिदले २ तथा ज्याकोब बेथहेल र ब्रायडन कार्सले समान १ विकेट लिए ।

त्यसअघि बर्मिङ्घममा टस हारेर ब्याटिङको निम्तो पाएको घरेलु टोलीले निर्धारित ५० ओभरमा ८ विकेट गुमाएर ४ सय रनको विशाल योगफल तयार गरेको थियो । इङ्ग्ल्याण्डका लागि ७ नम्बरसम्मका ब्याटरले ३० रन माथिको स्कोर गरेका थिए ।

इङ्ग्ल्याण्डका ४ ब्याटरले अर्धशतक पूरा गरेका थिए । इङ्ग्ल्याण्डका लागि ज्याकोब बेथहेल, बेन डकेट, कप्तान ह्यारी ब्रुक र जो रुटले अर्धशतक पूरा गरे । बेथहेलले ५३ बलमा ८ चौका र ५ छक्काको सहयोगमा सर्वाधिक ८२ रन जोडे ।

डुकेट ४८ बलमा ६०, कप्तान ब्रुक ५८ र रुट ६५ बलमा ५७ रनमा आउट भए । विल ज्याक्स ३९ तथा जस बटलर र जेमी स्मिथ समान ३७ रनमा आउट भए । वेस्ट इण्डिजका लागि जयडेन सेल्सले ४ तथा जस्टिन ग्रेभ्स र अल्जारी जोसेफले समान २ विकेट लिए ।

३ खेलको ओडिआई सिरिजको दोस्रो खेल आगामी आइतबार रहेको छ ।