एजेन्सी – इण्डियन प्रिमियर लिग (आइपिएल) को इलिमिनेटरमा मुम्बई इण्डियन्सले गुजरात टाइटन्सलाई २ सय २९ रनको विशाल लक्ष्य दिएको छ ।

न्यु चण्डिगढमा रहेको महाराज योद्धाभिन्द्र सिंह अन्तर्राष्ट्रिय क्रिकेट स्टेडियममा टस जितेर ब्याटिङ गरेको मुम्बईले निर्धारित २० ओभरमा ५ विकेट गुमाएर २ सय २८ रन बनायो ।

मुम्बईका रोहित शर्माले ८१ रनको अर्धशतकीय इनिङ खेले । उनले ५० बलमा ९ चौका र ४ छक्का प्रहार गरे । पहिलो विकेटका लागि रोहितले जोनी ब्रेयस्ट्रोसँग मिलेर ८४ रनको साझेदारी गरे । ब्रेयस्ट्रोले २२ बलमा ४ चौका र ३ छक्काको सहयोगमा ४७ रन जोडे ।

दोस्रो विकेटका लागि रोहित र सूर्यकुमार यादवसँग ५९ रनको साझेदारी गरे । सूर्यकुमार २० बलमा १ चौका र ३ छक्काको सहयोगमा ३३ रन बनाएर आउट भए ।

तिलक बर्मा ११ बलमा ३ छक्काको सहयोगमा २५ रन जोडे । नमन धिर ६ बलमा ९ रनमा आउट हुँदा हार्दिक पाण्ड्या ९ बलमा २२ रनमा नट आउट रहे ।

गुजरातका साई किशोर, प्रसिद्ध कृष्णाले समान २ तथा मोहम्मद सिराजले १ विकेट लिए । गुजरात लिग चरणमा तेस्रो तथा मुम्बई चौथो भएर इलिमिनेटर खेल्दैछन् ।

यो सिजनमा मुम्बई र गुजरात तेस्रो पटक आमने सामने हुँदैछन् । यसअघि भएका दुवै भेटमा गुजरात विजयी भएको थियो ।

मुम्बई र गुजरातबीचको विजेता टोलीले दोस्रो क्वालिफायरमा स्थान बनाउने छ । आज जित्ने टोलीले दोस्रो क्वालिफायरमा पहिलो क्वालिफायरको पराजित टोली पञ्जाब किंग्सको सामना गर्नेछ ।

दोस्रो क्वालिफायरको विजेताले रोयल च्यालेन्जर्स बेंगलुरु(आरसिबी) सँग उपाधिका लागि खेल्नेछ । पहिलो क्वालिफायरमा पञ्जाबलाई ८ विकेटले पराजित गर्दै आरसिबी फाइनल पुगेको थियो ।

गुजरात र मुम्बईले हालसम्म ७ खेल भएका छन् । जसमध्ये ५ खेलमा गुजरात र २ खेलमा मुम्बई विजयी भएको थियो ।