काठमाडौं(हाम्रो खेलकुद) – रोहित ठाकुरको अलराउण्ड प्रदर्शनमा टिबी साह राष्ट्रिय यु १६ प्रतियोगितामा बागमती प्रदेशले विजयी सुरुवात गरेको छ ।

प्रतियोगिताको पहिलो खेलमा जित दर्ता गर्ने क्रममा बागमतीले कोशी प्रदेशलाई १ सय ५ रनले पराजित गरेको हो । २ सय ३६ रनको लक्ष्य पछ्याएको कोशी २५.३ ओभरमा १ सय ३० रनमा समेटियो ।

कोशीका लागि कप्तान शिवासं बजगाईंले ५५ बलमा ६ चौका र १ छक्काको सहयोगमा ५० रनको अर्धशतकीय पारी खेले पनि टोलीलाई जित दिलाउन सकेनन् ।

सुगम बुढाथोकी २३, सकुशल श्रेष्ट १६ तथा अफान ताहिर १५ रनमा आउट भए । बागमतीका लागि रोहितले ३, कप्तान प्रसिद्ध जैशी र कमल शाहीले समान २ तथा राजेश बोहोरा र तपेन्द्र बिष्टले समान १ विकेट लिए ।

त्यसअघि कालिन्चोक क्रिकेट मैदान सुर्खेतमा टस जितेर बागमतीले ब्याटिङ गरेमा ४८.१ ओभरमा २ सय ३५ रनमा अल आउट भयो ।

बागमतीका लागि रोहित र राजेश बोहोराले अर्धशतक बनाए । राजेशले ५२ बलमा ९ चौका र १ छक्काको सहयोगमा सर्वाधिक ६९ रन जोडे । रोहित ६८ बलमा ६ चौकाको सहयोगमा ५७ रनमा आउट भए । कप्तान प्रसिद्ध जैशी ३९, इशान साह सुवेदी र जय साह समान १६ रनमा आउट भए ।

कोशीका लागि अलिस मण्डल र सुयोग भट्टराईले समान ३, राजिव महतोले २ तथा कविराज खत्रीले १ विकेट लिए ।

जितका सुरुवात गरेको बागमती २ अंकका साथ तेस्रो स्थानमा छ । पहिलो खेलमा सुदूरपश्चिम प्रदेशलाई पराजित गरेको कोशी २ अंकका साथ ५औं स्थानमा छ ।

सिंगल राउन्ड रोविनमा हुने प्रतियोगितामा सात प्रदेश सहभागी रहेकाे छ । लिग चरणको खेलमा शीर्ष दुई टोलीले फाइनल खेल्नेछन् । फाइनल जेठ ३१ गते हुनेछ ।

यस प्रतियोगिता एसिसी मेन्स यु १६ इष्ट जोन कप २०२५ का लागि छनोटका रुपमा समेत रहेको छ ।