काठमाडौं(हाम्रो खेलकुद) – आइसिसी विश्वकप लिग टु को खेलमा नेपालका स्पिनरद्वय ललित राजवंशी र दीपेन्द्रसिंह ऐरीले स्कटल्याण्डको महत्त्वपूर्ण विकेट लिएका छन् ।

ललितले अर्धशतक बनाएका चार्ली टियरलाई आउट गर्दै ९४ रनको महत्त्वपूर्ण साझेदारी तोडेका थिए । चार्लीले तेस्रो विकेटका लागि कप्तान रिची बेरिङ्टनसँग मिलेर बलियो साझेदारी निर्माण गरेका थिए ।

चार्ली २२ औं ओभरको पाँचौ बलमा ललितबाट बोल्ड भए । उनले ६५ बलमा ९ चौकासहित ६८ रन जोडे । ३० औं ओभरमा दीपेन्द्रले फिन्ले मक्रिथलाई आउट गरे । १७ रन जोडेका फिन्लेलाई दीपेन्द्रले आफ्नै बलमा उत्कृष्ट डाइभका साथ क्याच गर्दै पेभेलियन फर्काएका थिए ।

स्कटल्याण्डले ३० ओभरमा ४ विकेट गुमाएर १ सय ५१ रन जोडेको छ । कप्तान बेरिङटन ५४ रनमा खेलिरहेका छन् । क्रिजमा म्याथ्यु क्रस छन् ।

त्यसअघि टस जितेर ब्याटिङ गरिरहेको घरेलु टोली स्कटल्याण्डविरुद्ध नेपालले राम्रो सुरुवात गरेको थियो । नेपालका लागि दोस्रो ओभरको पाँचौ बलमा पहिलो सफलता मिलेको थियो । तीव्र गतिका बलर करण केसीले शुन्य रनमा स्कटल्याण्डका जर्ज मुन्सीलाई आउट गराएका थिए ।

नेपाललाई दोस्रो सफलता करणले नै दिलाएका थिए । करणले छैठौं ओभरको चौथो बलमा ब्रेण्डन मकमलनलाई ५ रनमा आउट गराएका थिए ।

सोमबार भएको भेटमा करण केसीको उत्कृष्ट प्रदर्शनमा नेपालले स्कटल्याण्डलाई १ विकेटले रोमाञ्चक तबरले हराएको थियो ।